es mösi Schtrucktuhre gäh

wo öis erhaltid

so wes Bluet zirkulieri

oder wenöis s Chnochegrüscht schtüzzi

so wärdid mihr treit

au wämmer schlächt drah segid

oder au wämmer schpinid

es gebi so öppis wenes

gsellschafftlichs Bluet

und gsellschaftlichi Chnoche

wo garanntierid dasales wihtergöngi

au wämmer s Gfühl hebi dasales

mössti zämechrache göngis wihter

dahs segi käs Wunnder sondern segi

durchuhs nattürli mihr hebid

e langi Gschicht hinder öis

jahrhundertelang segi ales

uhfbout worde dahs chöni nid

kaputtgah au wänn d Helfti vo denä

wo dah umelaufid gmeingfährlichi Tüppe segid

es segi wenineme Flugzühg dahs flühgi ja

au fascht automahtisch dah bruchis

nurrna minimali Ihgriffe und

daderzue segid mihr ja immerna

i de Lahg es gebi immer na

en gwüssi Prozänntsazz vo tüchtige

und bruhchbare Lüht also

mer mösi kei Angscht hah

es flühgi es fahri

mer währdid treit