Mittwoch, 6. Juni 2018


das segi ja scho lang

sini Theorih gsih

es mösi i öisere Gsellschaft

immer Inschtanze ha

wo belehre und belehrend

uf allne umehacked

mer mösi ufpasse

suscht haui eim eine

oder au eini eis uf de Teckel

es segi soh we wänn immer

eine oder eini mittere Kühle

wür dah schtah und jedem

eis tätsche wo verbihgaht

är passi uhf imm passieris nihd

aber allne andere passieris

und alli andere fanged sich a tucke

und chönd schliessli

gahr nüme ufrächt gah

är göngi na ufrächt

aber de Priis wonär zali

segi höch är mösi sich

echli zvill ärgere

är nüzzi sich ab

är chömi zu nüht

und dahs segis Ziihl

vo all dene Ahschträngige

dahs segis Ziihl

Lüht wo zu nüht me chömid

voralem nid zum Tänke

Dienstag, 5. Juni 2018



wiä chömmir mache

das öppis passiert

was mösstich säge

ich chönntja viles säge

ich tänke ja de ganzz Tahg

immernur Sache woni nid säge

ich säge so vill nihd

dases falsches Bild entschaht

und dänn immer

öppis ganz anders passiert

als passiere chönnti

sägi also nids Richtige

oder sägi ebä grad s Richtige

mues ales soh sih wes isch

mömmir öis demit abfinde

oder chömmir öppis verändere

würdid mir öppis verändere

wämmir öppis anders säge würdid

oder chähmtis dänn nur

zunere chliine Verschiebig

zunere churzfrischtige Uhfregig

zunere Energihverschwändig

und würi dänn s Pändel

wider zruggpändle

und wär dänn ales

wider soh we vorhär

und hinderet öis drumm

e gschiidi Natuhr

das ales zsäge

womer wetti säge

und bruhcht d Natur

settigi Exemplar

wo immer de Chopf

voll schöhne Sache händ

oder wo glaubid

immer de Chopf

voll schöhne Sache zhah

bruhchtsi dahs

für iri Zwäcke

es liessti sich

durchuhs e Evoluzziohn dänke

bi dere bi de sogenannt höchere Tier

ales ganz anderscht verlaufe wühr

es wäri dänkbahr

dasd Evoluzziohn sich d Ameise

oder d Piänä oder suscht es Insäkkt

zum Muschter nähmti und mir

so keis Bewusstsih hettid

es würd aber ales gliich funckzioniärä

genau gliich oder na besser

mer wäred eifach dur Grüch gschtühret

dur Tämpperattuhre und chemischi Prozäss

aber was reded mir dah

villicht ischesja grad eso

und mir märkez nur nihd

mir märkez nihd

sini Gedicht und au ales andere

das tuusigdrühundertsiitige

ut videlicet

segid für Mänscheforscher bestimmt

si mögid drus entnäh
wahs ales möglich segi

Dienstag, 29. Mai 2018


s Singe segi vilicht nures Betohne

bimm Singe fülimer Wöhrter mit Bedühtig uhf

bimm Singe machimer öppis us Wöhrter

wo eim normahlerwihs ganz unnschihnbahr tunkid

zum Bihschpihl s Wohrt eferissing oder s Wohrt nassing

inn berüeris immer am meischte

wännsi uf e nöji Ahrt uhsgschproche wärdid

am Schönnschte segis bi ganz chlihne Säzz

womer tänki mer chöni dah nüht ahfange demitt

wo de Künschtler aber zum Lühchte bringt zum Funkkle zum Bräne

und soh gebis us wenige banahle Buechstabe

efeimahl

en Wansinnszauber

singe segi

verzaubere

singe segi

verwandle

singe segi
verbessere

Mittwoch, 23. Mai 2018


Liäbi

hebi vill

mit Religiohn z tue

Liäbi segi wene Religiohn

mer vereehri öppis Verborgenix

mer vereehri öppis Lihdenz

mer bätti e Gottheit ah

dahs gsechimerjascho im Hohelied

deeht göngis au um Unnerreichbahrs

deeht wärdi au verzwihflet gsuecht

mer meini immer dases chömi

aber es chömi dänn doch nihd

oder wänns würkkli chömi

wasja vilicht mögli währ

wänns würkkli chömi

dänn segis am beschte wämer verschwindi

und zwar so rasch als mögli

dänn mösimer devohräne
so hebizes im Hohelied dahrgschtellt