sis Läbe ischem plötzlich
wenes Wunder vorchoh

er hätt sichs nid chöne erchläre

es hätt ales irgendwiä gschtimmt

Ort, Ziit, Familiä, Pfadi, Lehrer,

Schtudium, di kattolisch Chile, Liechtattletik,

au wänn imm ales Gschpängschtisch

erschinä isch häzz gschtimmt

d Bruefswahl und sogar s Militär,

und vilicht au d Liäbäna, d Politik,

überahl hätter sich wunderbarerwiis

bewährt, so wenigschtens

häzz nach usse uhsgseh

für inn aber isches es Duremogle gsih,

e Schauspilerej, fascht scho en Betrug,

aber isch nid ales en Betrug,

hätter tänkt, hani nid immer

nur mit Betrüger z tue ghah,

mit Scharlatane.