am Schluss
hämmer au na de Islahm

hervorgrüeft

und soh gmacht wener hütt isch

 

er läsi gärn
vo veruckte Sache

wo im Ussland passierid

er läsi gärn

das im oschttürkische Hakkari

i einere einzige Wonig

tuhsigeihundertacht Wäler regischtriert segid

er läsi gärn

das imene nid vorhandene föifte Stockwerk

vomene Huus in Ischtanbuhl

dreihundertvieresibezg Wäler

uff de Lischte stöchid

er läsi gärn

das in Nigeria sitt

vierzg Jahr amene Schtahlwerk

bout wärdi

in Ajokuta

hebizi acht Milliarde Dollar uhsgäh

aber na keis einzigs Stückli

Schtahl produziert         

 

 

iezz weisser nüme
worah er gsih isch
es isch vilivht besser
wäners nüme weiss

 

es nimmt käs änd
es chunnt immer widder

na eine dethär

de frouseneinscheltino

de hannsjettischtamm

de urbangwärder

de martinschwander

es nimmt käs änd

au de baschibangerter

untt brigittmäng

untte waltervögeli

untte rönesimmen

au de timottiliäri

mittem golowin

unntte irehngerschter

unntte margritjäggli

es sind öppe sächzg

das ales

hetter chöne ha

wäner hett welä

nicht
nicht
nicht
nicht   

 

 

de Brächt
segi en unahgnehme Mänsch gsi

aber d Fraue segid immer

uf inn ineghejt

si ghejid ja immer uf settig ine

wo irgendöppis produziered

wo Erfolg händ und Priise überchömed

au wänns de gröscht Blödsinn isch

 

er wetti
gärn wüsse

wassi tänked

weli Hoffnige si erfüled

weli Sehnsücht

weli Härzensregige

es mössti doch öppis

i dere Art gäh

es chönn doch nid eifach

nüt gäh

nüt sih

öber ächt

hätter tänkt

wenigschtens eimal

en Gägeschtand gsi segi

i irem Hirni

möglicherwiis ja

nid en Guete

möglicherwiis ja

en Unnahgnehme

möglicherwiis ja sogar

en höchscht Unnahgnehme

 

was wotter
was fintter

was glaubter

was mösster

was chönnter

was setter    

 

 

er segi zradikal
er sägi besser nüht

es wäri unerträglich

aber er segi vilicht nid elei

es gebi womöglich vili

wo so tänkid wenär

aber si gebiz nid zue

au gägenüber sich sälber

s wäri ales zgfärlich

 mer wirtt
mittöi
färtig wärde  

 

 

was hätter ächt
was hetter ächt

was würder ächt

was wetter ächt

was tänkter ächt

was machter ächt   

er mösi dahs
na gnauer ahluege
hätter gseit    

aber es segi woll
na a villne Ohrte so

wämer e Charte hetti

wär woll di halb Schtatt

root ihgfärbt

oder de halb Kantonn
oder di halb Schwiiz    

 

vo ziit zu ziit
hätter agapi grüeft
agapi agapi      

 er segi immer
der Uhfassig gsih
das     

 

 

es segi gränzwärtig gsi
aber gränzwärtig
segi ja immer ales

 

de Militärdienscht
hebi inn mängmal so verschtört

dass de Korporal gmeint hebi

er schpini

dä Korporal segi immer früntlich gsih

und hebi vill mittimm grett

si hebid gueti Gschpräch ghah

fascht scho e Früntschafft heber tänkt

aber verschtande worde seger woll nihd

er segi ja au nid z verschtah gsih

voralem ganz furchpar tumm

segis gsih

aber das hebis nid nur

im Militärdienscht gäh

das segi mängmal au a andere Orte passiert

mit Fraue zum Bihschpihl

au Fraue hebid gmeint

er segi öppis nid rächt mit imm
es schtimmi öppis nihd

 

 er glaubi
daser widder
zruggchräppse
setti                

 

mer mösi
de Amerikaner

ewig dankbar si

für d Musik

diä Musik segi s einzig

wo für inn na zeli

i de letschte sibezg Jaar

de Rescht segi Verzwiiflig
für inn zeli zum Bihschpihl

dä Mäddi Waters

odder dä Tschoni Winter

es beschäftigi inn immer widder

dass dä in Bülach gschtorbe isch

imene Hottelzimmer

känn Mänsch weiss

waser deht hätt wele mache

in Bülach

am sächzähte Juli zweituusigviärzäh

 

 

was wühr si ächt mache
wänn ire emal en schöne Gedanke chiem

tumm
tümmer
am tümmschte        

was gfallter widder nihd
mir gfalt viles nihd
das isch dis Probleem

 

da hebers schowidder
da läsers schowidder
scho zum viärte Maal               

da tüe si iezz

ales wäggputze

und schteled Mehrfamiliehüser häre