mer chömi übrigens au

i de Kunscht nüme wiiter

sit hundert Jahr chömi mer deht nüme wiiter

und doch gebis immerna en Kunschtbetriib

und immerna Maler und Bildhauer

und au sogahr Kommponischte

wo na de Muet hebid öppis z komponiere

wo so uverschammt segid dahs au ufzfüere

unds Verücktischt segi

dases au immerna Schriftschteller gebi

diä immerna Büecher schriibid

oder gahr Gedicht

debi segis sunneklar

das ebe grad dah de Vorraht erschöpft segi

das ebe grad dah nüht me zmache segi

mer chöni schona öppis mache

mer chöni ja immer irgendöppis mache

aber es segi nüht rächz

es segi nur einfach

na e Liirerei