enanders Problehm

wo inn na beschäftigi

segis überläbe vo de Komplizierte

warum chönid Komplizierti überläbe

är hebi dah verschideni Hippothese

es segi warrschinnli glich we bi dä Tumme

deht wunderi mer sich au dasses si gebi

aber es gebi si will si nötig segid

s Sischtehm bruchi e grossi Zahl vo Tumme

es bruchi immer en Huufe wenig Qualifizierti

womer vorah gah lös wänns gfährli segi

womer schöni Sache glaube lös

die dezue füerid dass si wiä Wansinnigi

für eim schaffe und für eim sorge tögid

und eim verteidige tögid

wänns di Tumme nid gäh wühr

wäri s Läbe seer vill schwiriger

wäri s Läbe eigettli ganz ummöglich

aber werum gebis nun auna Komplizierti

di Komplizierte segid

e bsunderi Sortte vo Diener

Diener wo schtändig um die Gschihde ume segid

und wo di Gschihde vo de weniger Gschihde und de Tumme tögid abschirme

es entschtöchid ja mängmal doch

gwüssi Ufregige und Hoffnige und Forderige

und dänn chömi d Schtund vo de Komplizierte

dänn zeigid si iri Exischtänzberächtigung

dänn tögid si ali diä Lüht

wo dah dethärchömid

uhfhalte und beschäftige

und zur Verzwiiflig triibe

dänn errichtid di Komplizierte

en undurchdringliche Tschungel

vo Richtlinie und Rächtsnorme

dänn chömid di Komplizierte

mit Formulahr und Frischte

und es gebi keis Mittel degäge

nidemahl e Revoluzziohn

nachere Revoluzziohn segid ja sofort wider

ganzi Heerschahre vo Bürokrahte da

wo di neue Machthaber umgänd

wiäne Armeeh oder wiä e Prieschterschaft