er hebi niä gwüsst

währ däh chlih altt Mah gsi seg
wo im Hindergrund so wunderbahr gsunge hebi
I want all of it heber gsunge
all of it not some of it
I want all of it
ä pahrmahl hinderenand
iezz wüssers
wiler zuefellig amene Samschtigahbig Arte
glueget hebi wos nachem zwölfi e Sändig pracht hebid
über de Tschimi Sgott
de Tschimi Sgott segi ide sächzger Jahr emal echli berüemt gsih
und hebi mit villne grosse Musikker zsäme chöne uhfträtte
er segi aber sehr chlih und kohmisch gsih
und hebi nid chöne vermarktet wärde
obwoler eine vo de grossartigschte Sänger gsih segi
es hebi imm nüht gmacht daser nid berüemt worde segi
und er hebi unbekannt und bescheide gläppt und mängmahl
amene Ahbig imene Altersheim gsunge
woner sich emahl am Radio ghört hebi und mer debih gseit hebi
das segi de Tschimi Sgott woscholang tohd segi
hebi sini Frünndihn sofort em Radio ahglühtet und hebi gseit
de Tschimi Sgott läbi dänn na und singi na immer
und dahs hebi e Rihsesach ggäh
es hebid sich plözzli vili a inn erinneret
und hebid inn wider wele ghöre
und soh seger wider uhfträtte
und sini Schtimm segi wunderbarer gsih als je zuvohr
vili Grohssi hebid gseit es segi d Schtimm vomene ängel
und soh segi au de Luh Rihd uf inn ufmerksamm worde
und hebi inn angaschiärt und hebi inn singe lah
all of it not some of it
er segi iezz sicher öppe füfesibezgi
ganz gwaggelig und gfürchig allt
aber er singi ganz überirdisch schöhn
und segi sones unnghührs Schenih
dases nu wenig begrihfid
es hebi Ufnahme ggäh vo imm
wener na z Nöiork umeschpaziärt
und womer inn gfrähget hebi
waserna machi waserna erwahrti
heber gseit
er erwahrti na s Schönscht
er wüssi dasems Schönscht nanig begegnet segi
und dasems Schönscht na begegni