es segid dahs ales Versüech
oder enart Teschts
oder Probeläuf
fürr de Aernschtfall
är tränieri eigentlich jedä Tag
und jedi Schtund für de Aernschtfall
aber är glaubi
dä Aernschtfall chömi gahr niä
är läbi ja inere relativ
sichärä Wält
es gebi dah kei Tohti
und kei wo verhungered
und är chömi sicher niä
inä Situatzion wonär mössti
flüchtä und wägränne
und wonär mössti
vo neuem aahfange
es bliibi mit gröschter
Warrschinnlichkeit
ales soh wiäs segi
aber är segi gliich zwunge
sich vohrzbereite
es segid biologischi Programm
wo ablaufid
öbmers nun welli oder nid
är jedäfalls segi perat
perat fürs Schlimmschte
aber au fürrs Schönschte
für Uuflöhsige, aber au
für neui Verbinndige
är würdi warrschinnli
ali Uuflöhsige überläbe
tänki är, är würdi
ales Mögliche überschtah
är währi ja entschprächend vohrbereitet
aber är chähmi ja dänn nur
i neui Zueschtänd
und i neui Verpflichtige ine
wo inn ales ebäso würdi plahge
är würdi i jedäm neuä Zueschtand
au wider neui Kattastrohffe
vorwägnäh müese und er mahli sich
bereizz jezz ali diä neue
Kattastrohffe uhs
sehr läbhafft, so läbhafft
dasär mitt simm jezzige Zueschtand
widder sehr zfridä segi
mitt simm jezzige Zueschtand
segi är mängisch nid zfride
är glaubi dass dä Zuestand
nümme lang chöni ahduure
das duuret nüme lang
dänki er fascht jedä Tag
aber er glaubi
das au alli andere Zueschtänd
nid lang wärdid duure
sicher weniger lang
als de jezzig Zueschtand
wo scho vill zlang aaduuret
Keine Kommentare:
Kommentar veröffentlichen