dass dahs niemer märki

segi eigentlich schahd

er hetti gärn dases öpper märke wür

wenigschtens e paar chönntids märke

es gebi möglicherwiis scho Mänsche

wos märke würdid

aber diä Mänsche segid

weiss de Tüüfel woh

aber er glaubi eigettli nid

dases hüttna settig Mänsche gebi

früener hebis villicht settig Mänsche ggäh

oder wenigschtens hebis Mänsche ggäh

wosich zu Mänsche hebid bilde lah

wo halbwägs gmerkt hebid was lohs segi

de Eckermah segi so eine gsi

aber däh segi vom Göhte erfundä wordä

und zum Eckermah gmacht wordä

er frähgi sich mängisch

öb ächt de Göhte homosexuell gsi segi

aber dahs spili nattürli kei Role

das segi überhaupt nid negatif zverstah

das würdi nur mängs erchläre

und imm segis nid wohl

wänn nid ales erchlärt segi

imm segis zum Biischpil

diä sonderbahri Liäbi es Rähtsel

diä de Göhte em Eckermah entgägebracht hebi

es segi eigentlich gar kei Liäbi

es segi scho fascht Vernarrtheit

und gliichzitig aber au

en unbegrifflichi und hässlichi Uhsbühterei

villicht hebis überhauppt nüht z tuä

mit Liäbi sondern nurr mit Uhsbühtig

de Eckerma hebi niä richtige Loh übercho

und hebi doch wellä hührate

i alle dene Jahr hebi sich de Göhte

niä für di persönlichi Situaziohn

vom Eckermah interessiert

es segi schaurig

wämmer das gsechi

villicht hebi ales

wasmer jezz so schöhn Liäbi nänni

überhaupt nüht mit Liäbi z tue

wämmer inn wür frägä

dänn würdi er so öppis

soffort unterschriibä