An K.M.

 

es segi sältsamm

er wüssi immerna

wo si gwonnt hebi

er wüssi auna

wener erschtuunt gsi segi

erschtuunt und beschtürzt

woner si emal gseh hebi

wesi en Schuelkamerad

käne useme guete Huus

uf sim Velo heigfahre hebi

si segi vor imm gsässe

uf de Schtange

und er hebi ihres Haar im Gsicht ghah

und emahl seger ja

woner si am Strasserand stah gseh hebi,

mittem Velo ine Abschrankig ine gfahre

d Schtrassearbeiter hebid

gfluechet we verruckt

es segi nämli en Fuessgängerschtreife

neu gmahlet worde und di gäle Farb

segi grusig verschmiert worde

si aber segi wiitergloffe

und är sofort wiitergfahre

si hebis woll vergässe

oder garnid gseh

sältsam segis gsih

dases immer allne suneklaar gsi isch

dass sii die Schönschte gsi segi

di Schönschte wiit und breit

und sältsam segis gsih

dases imm au immer suneklaar gsi segi

das sii für inn

völlig unzuegänglich gsi isch

er hätt niä gwaagt mittere zrede

und si hebi inn sicher garnid wahrgnoh

hätt das möse sih

odder hett das

au anderscht chöne gah

ganz anderscht