es segi kohmisch

är erinneri sich

mängmahl wenär früener

schwirigi Ziihte gha hebi

wenär i schwirige Verhelttnis gläpt hebi

es segi ganz bsunders kohmisch

und wenär mitt dene Verheltniss

jewiihls färtig worde segi

är segi mitt denä Verheltniss färtig worde

indem er si so vill we mögli innjoriert hebi

är segi sich dänn ganz normahl vorchoh

au wänn inn anderi als scho rächt sälttsamm

als echli beschränkkt als kohmisch

als imene gwüsse Sinn unnbruchbahr

ahgluegt hebid voralem Fraue

bi Fraue segi dahs vorchoh

die hebid dahs

mitteme gwüsse Beduuhre

feschtgstellt

es segi kohmisch

aber hütt glaubi är

dasär sich doch verbesseret hebi

hütt schiinis imm

dasär wesenttlich besser drah segi

aber iezz grahd hebi är wider tänkt

dass dahs vilicht doch nid stimmi

es stimmi vilicht überhaupt nihd

und är segi komischer als jeh

mer märkis nur nid

will mit ale andere

au nüht me ahzfange isch