er wüssis nihd
er wüssinid
wasen raga segi
essegi warrschinndli
e chlahg
e langi chlag
si hebid immer öppis zchlage
diä Innder
sicher villmeh als mir
mir hebidja eigettli nüht zchlage
mir tärfid nid chlage
niämärt weli Chlage ghöre
schogarnihd d Fraue
und grad über d Frau
hebimer ja am meischte zchlage
er benihdi diä Innder
dassi eifach so chlage chönid
zwännzg oder föifezwänzg Minute lang
er wüssti gärn
wassiso plahget
was gfalltene nihd
hänzzi en Überschwämmig
hänzzi Hochwasser
oder hänzzi kei Wasser
oder hänzzi e Liäbäsgschicht
es töhnt ganz wewännsi
e Liäbäsgschicht hettid
liäbäzi effentuell unglücklich
odder göngis um anderi Sorge
sinnzächt eifach soh
ohni öppis unnglücklich
sinnzächt nid zfride
mittdemm wo si händ
wettizächt liäber nöimet anderscht sih
wettizächt liäber z Eurohpa sih
wettizächt i de Schwiiz sih
i de Schwiiz
z Luzärn
wettizächt anderi Musikk mache
wettizächt Handörgele und Joddle
wettizächt Alphornblahse
au en Alphornbleser blasi lang
chöni e halbschtund lang
blahse
unttöhne
wettizächt anderi Musikk mache
oni iri komische Örgeli und Trümeli
hettizliäber Simmfoniä kommponiärt
wettizi liäber garkei Musikk mache
wettizi so riich sihh
dassi kei Musikk me mösstid mache
dassi nurrna chönntid zuelose
oder segizvillicht Peamtti
undsegizächt vo Schtellechürzige betroffe
dahs alles wüssernihd