är chömi nid so rächt wiiter
är chömi nid nur nid wiiter
är göngi glaubi är retuhr
är chömi sich vor
we öpper wo ine Wand inegloffe segi
und de Grind ahgschlage hebi
und zruggprallt segi
und nüme rächt wüssi
was los segi
es gebi Wänd
die öis begränzid
und zwahr ändgültig
zallererscht segis däh kohmische Planeht
vodemm mer nid los chönn choh
diä gschpässige Natuhr
voller tummer Nathurgsezz
dänn segis däh zwiifelhafte Affekörper
dänn segis diä elände Sprach
mit derä mer sich nid chönn uhstrucke
dänn segiz allerlei gfürchigi Gschtalte
woneim welid under de Bode bringe
so chömimer zu nüht
hütt erscht rächt nüme
hütt chömi niämärt me zu öppisem
es segi färtig
es segi alles erschöpft
es gebi kei Antworte me
dahs segi nid eifach e Floskle
dahs segi mattematisch bewise
s einzig womer wüssi segi
dases unlösbahri Problehm gebi
s einzig womer wüssi segi
daseim iezz dänn bald
s Wasser überem Chopf zsämeschlöchi
