merchönnti na vill säge
merchönntidah nameh kommentahre abgäh
unttänn chömid sofort wiihteri Frahge
undes gebi daderzue na tuhsig sache zsäge
und diä tuhsig sache füegid sich amänd
zumene grosse Bild
zumene usserordentliche Bild
zumene phantastische Bild
es formi sich so ales
zu eim grosse ihdrückliche Ganze
zu eim einzige unnghüre Sumpf
wobi mer nid meine mösi
er weli dadermit öppis Negatifs säge
en Sumpf chöni öppis Interessannz sih
imene Sumpf gebis vilicht
di wunderbarschte Blueme
di chrefftigschte Chrühter
di schärffschte Greser
di sältenschte Tiär
Libäle, Chrött, Wasserflöh,
chlini schwarzi Schlängli
Schnägge Schpine Schmätterlinge
dahs därfimer nid vergässe