wisoh schrihbezi dahs ales wisoh lönzi dahs use

es mössti öpper choh und öppis schriihbe drüber

öpper mösstis analisiärä und öis säge wisoh mer

wirz i füffzgg Jahr schtudiäre aber mer wirt au

i füffzgg Jahr nid dehinder choh soh wemer iezz

nid dehinderchunnt was vor füffzg Jahr passiärt

isch mer wirt aui füfzg Jahr sudle und mer wirt

i füffzg Jahr de gliich Mischt uselah we iezztt

wänn na öpper dah isch überhauppt är glaubi das

dänn niämärtme dah isch äs wärdi niämärttme dah

sih oder wänn na öpper dah segi dänn segiz nuhr

na Veruckti und imm Schrank hebis am Bode-n-une

en Fuchs gha gnauergno en Fuchspelzz und vo Zit

zu Ziht hebi sini Mueter dä Pelz usegno und imm

zeiggt en schöhne lange Pelzz en richtige Fuchs

mit eme Fuchsschwanz undeme Chopf mit ihgsezzte

Auge und mit Bei und Tazze und ere Chlammere im

Muuhl aber d Mueter hebi däh Pelzz niä treit er

segi immer nuhr im Chaschte gläge am Bode-n-une