er hebi immer sonen Druck uf de Bruscht
nid deht wos Härz segi nid links ehner rächz
däh Druck chömi vomm Schtress wobih är nid rächt wüssi
wohär de Schtress chömi er hebis ja relatihf eifach
es göngi imm besser als villne andere aber es segi
we wänn de Schtress vom Läbe an sihch chiemti
s Läbe an sihch segi öppis woninn fascht jedä Tahg
erschrecki wänähr es Auto gsechi dänn erschrecki är
es gebi vili Sache wo für anderi ganz normahl segid
wo anderi gahr nid bemärkkid aber är bemärkis
i inn dringid diä Sache ih we Nahdle we grohssi
langi Schpiess we Kanonechugle schüssiz durinn dure
är wärdi wo Sache uhfgschpiässt wonär i de Ziitig läsi
zum Bihschpihl übert Frankfurtter Buechmäss über
de Uhftritt vo de Schwiiz dah regi inn grausam uhf
zum Bischpihl au übert Eggsponulleis är hebi gläse
diä Eggsponulleis segi nüht als en Kunschtfurz
är läsi a derä Eggspo gebis Hoschtesse wo gliichziitig
au Seggsarbeiterine segid me weli deht de Seggsarbeiterine
au en Uhsschteligspawilon gäh wo si iri Arbet chönid vohrschtelle
es wärdi Hoschtesse gäh wo gliichziitig Proschtituierti segid
und mer chöni wäneim e Hoschtess gfali öppis abmache mittere
settix Zühg schtressi in furchbahr
är würdi wänähr chönnti
d Eggspo vo Nünnzäviäräsächzg wider uhfboue
oder vilicht sogahr d Landi vo Nünnzähnünedrihssg
es würdi gahr nüht schade
diä Landi namel uhfzschtelle
mer würdi gseh dases doh na normahli Lüht ggäh hebi
d Lüht würded sich warrschinnli schäme
wännsi diä Landi gseh würdid
und es währ e Zuemuetig fürrsi
Keine Kommentare:
Kommentar veröffentlichen