er hebi hütt fascht nur Güezzis ggässe

zerscht zum Zmorge en Nuss-Schtängel

eine vo dene ticke grohsse Nuss-Schtängel

wonär so gärn hebi er glaubi mer chönnti

problehmlohs läbe wämer pro Tahg eine

vo dene Schtängle würdi ässe soh nahrhaft segiz

echli schpähter heber dänn en Schpizzbueb ggässe

en grohsse d Frau hebi imm däh heipracht so grohss

wenen Chueche seger gsih sicher so grohss we

vier chliini normahli Schpizzbuebe also au vo demm elei

hetter sicher en ganze Tahg chöne läbe iezz heber aber

nah wiiteri gueti Sache iezz heber na es Schoggi-Igeli

vom Eichebärger dahs segi sini Lieblingspattisserih

diä segid ganz wahnsinig guet si gsechid allerings

soh härzig uhs dasesinn immer echli überwindig choschti

sih zässe und iezz heber au na en Appezäller Biberflade

woner ade Hundertfüffzgjahrfiir amene Schtand kauft hebi

und erschtna chliini Prüssiän vo de Migro und auna

zwei Schoggene also es göngi imm wideremahl seehrguet

d Prüssiän segid allerings scho drei Tahg offe und

warrschinnli nüme richtig knuschperig sondern echli weich

vilicht sinnz zimmli gruhsig und mer mösis furttrüere