är wüssi nihd

weli Tage schönner segid

diä Tage wo si dah segi

oder diä Tage wosi nittah segi

wännsi dah segi segis

fascht scho z schöhn

wännsi nittah segi segis

au fascht z schöhn

diä Tage hebid au en

fanttastische Reiz

är segi dänn soh verlohre

är wandli dänn

soh nähch am Appgrund

dases gwaltigi Chrefft

frejsezzi i de Appsännz ligi

womögli meh Glück

als i de Presännz dahs hebi

de Pruhscht gseit däh segi

wenär en grohsse Appsännzschpezialischt gsih

en Appsännzkünschtler wonamändi

nurrna i de Appsännz gläppt hebi

und nüme i de Presännz daderbi

mösimer schochli uhfpasse

är luegi drumm das au d Presännz

nid ganz undergöngi auwänndahs

unnghühr schwirig segi und womögli

na schwiriger als dahs

wo de Pruhscht gmacht hebi