es hebi d Schüeler fascht vetäscht

vor Lache wonär Schuelschtunde ggäh hebi

e Schtellverträttig hebi är gha

inere Randschtund amm Morge-n-am Sibni

i Kunschtgschicht es segid nur wenig gsih

nur öppe föif er hebi allerdings nid gwüsst

wevills hettid selle sih vilicht

sind di meischte gahr nid choh

über de Eggsprässionismus heber grett

und hebi Dia zeiget Fraueporrträzz

und dah hebis diä Schüeler fascht vetäscht

si hebid ununterbroche s Lache vetruckt

und hebid ganz rohti Grinde ghah

voralem a eine töger sich erinnere

däh segi nähch binere ganz Hüppsche gsässe

und hebi gflüschteret und Wizze gmacht

sodass diä Hübsche überhauppt nihd

hebi chöne zuelose und totahl appglänkt

gsih segi und sihch au gärn hebi ablänke lah

sih hebi debih au en rohte Chopf überchoh

und är hebi en unnwarrschinnlich höche

Schtundeloh ghah esone Schtund segi

fanttastisch guet zallt gsih öppe

sibezg Franke heber überchoh dahs segi

öppe zählmahl meh gsi allser bi de

Sekkuritass überchoh hebi de Summer duhr

seger nämmli dänn bi de Sekkuritas gsih

und hebi als Nachtwächter sini Runde gmacht