aber nur ruig

kei Uhfregig bitte

vilicht isches ja

di beschti vo allne Wälte

vilicht chönimersi

uf kei Ahrt verbessere

und wänöis öppis inn Sinn chunnt

wo chönnti besser sih

so wärs i Würcklichkeit e Verschlächterig

mer chöni vilicht nid s Gringscht ändere

und mer mösi genau soh läbe

genau i derä Schpanig

genau i demm Unnglück

genau i denä Entbehrige

genau i denä Enttühschige

dahs hätt im übrige au scho de Göhte gmärckt

Entsägig häzz bi imm gheisse

mer mösi entsäge hätter tichtet

mer wärdi erscht Mänsch ider Entsägig

s Entsäge segi s Wichtigscht hätter gseit

au wänn ali gsühfzet händ debih

dulde hätter gseit dulde und entbehre

dahs wärdi gschezzt