früener hebi mer i de Familie

i ärnschte Usenandersezzige

enand Schandbriefe gschribe

är erinneri sich we sini Mueter

imm emal vomene Schandbrief vezellt hätt

wo sih ere Frau gschribe hebi

vo d Ehe vo irem Schwager kabuttgmacht hebi

diä Frau segi sogahr emal mitt irem Schwager

i de Wonig im Ehebett gläge

wo iri Schwägeri heichoh isch

ales Wasser wo d Aare appflüssi

hebi si dere Frau gschriibe

chöni diä Schand nid wäggwäsche

wo sih uff sich glade hebi

sonderbahr tunki inn dahs hütt

mer hebi ales echli z ärnscht gnoh

nid nu imm prifahte Läbe

au i de Schuel i de Politihk

und voralem imm Militähr s Militähr

chömi imm rückblickend wenän

gigantische Schandbrief vohr

es chömi imm überhaupt ales

us derä Ziit wenen Schandbrief vor

und doch segis e gueti Ziit gsi

e vill e besseri als di iezig