dahs wärdi gschezzt

hätter gseit

dahs wärdi gschezzt

aber vo wemm eigenttli

und werum

schezzt mers nur

willmer froh isch

dases e settig Tuble gitt

wo bliibed und schaffed

und entbehred

und dulded

wär schezzts

schezzts de Fürscht

oder de Hofprediger

oder de Oberschtallmeischter

oder di gnädige Fraue

wo immer bimm Throhn zue schtönd

und schezzezes würkli

oder schezzezes nur

wills ine nüzzt

will sih vo alle dene läbed

und we schtahts mit öis

schezzez dänn mir würkli

meined mir dänn was mer dah säged

es schezzts niämert würkli

das isch so guet we sicher

und doch bliibed mer

und halted fescht

und dulded und entbehred

und tönd derbih soh

we wämmer feschthalte würdid

und dulde würdid

und entbehre würdid

es isches zimmlichs Rähtzel