är hebi iezz

e Zittatsammlig aagleit

är sammli Zittat

är hebi scho bald tuusig zäme

es segid alles Zittat

vo grosse Filosofe

und Tichter und Tänker

und suschtige Geischtesgröhsse

es segid ales Sache

wo beihdruckend segid

är hebi si gsammlet

umm beihdrucke zchöne

är liidi seer drunder

dasär nid so zur Gältig chöni cho

i gwüsse Sittuazzione

är wetti gärn chöne überrasche

mit suppergschiide Wändige

är wetti gärn chöne fessle

mit geischtriiche Bemärrkige

är hebi immer s Gfühl

dasär seer uninteressantt segi

derbi segi är warrschinnli

eine vo de Interessantischte

aber es gebi niämärt

wo dahs märki

au diä

für diä

ali diä Zittaht

beschtimmt segi

märkis nid

oder tögi soh

wie wänn sis

nid märke würdi