hütt seit me das nüme

hütt wür eini stuuhne

wämmer ire das säge würdi

si wür das gar nid glaube

isch das nid truurig

dass si das nid glaube würdi

dass si meinti

mer machi sich luschtig über sii

I wetti das gärn säge

aber I säges natürli nid

wiä viles anderi au

I säge viles nid

weisch wasi wetti säge

aber I säges au dir nid

du wirsch das sicher

au nid guät finde

du würdisch säge es segi tumm

tumms züüg würdisch säge

hör uf mit demm tumme züüg

ja sowiit isches

dasmer Schöns und Guäts

als tumm aluegt

als liächt gschtört

mer will glaub au nid schön sih

mer will glaub au nid guät sih

das isch vill z müäsamm

da ischmer liäber bedüütigslos

und so langwiilig

dasses niämert lang mit eim ushaltet

also I säges nid

wasi ha welle säge

es isch öppis Schöns gsi