Z Africka

segi mer de Forschigsreisende

immer üsserscht findlich begegnet

immer mittem gröhschte Misstroue

d Afrikaner hebid niä chöne glaube

daseine eifach so reise welli

inere sone apsoluht gfährliche Wält

vomer nie wüssi öbmer am Abig na läbi

dasmer dah freiwillig hih chönnti gah

dahs hebid sie nid chöne begriiffe

dahs chönis nid gäh händsi tänkt

das öpper so öppis macht

das isch ja öppis vom Schlimmschte

wo eine cha mache so i die Wildniss zgah

es isch ja für die meischte de sicher Tohd

 

d Neger händ immer tänkt

das sone Reis en ganzen bsundere Grund mösi hah

öppis ganz wahnsinnig Böhses öppis so Böhses

dass sis gar nid chönid usefinde

öppis vill Böhsers als Handel

oder de Ihchauf vo Sklave öppis Gröhssers

es Riihseunheil e Riisekataschtroffe

und si händ drumm

sowiit si dahs i irer Angscht händ chöne

dene wiisse Tüüfle gschatt

wosine nur möglich gsi isch

und si händ Freud gha

wänn wider eine ligge bliibe isch

das hätt Muet gmacht und ine zeigt

dassi doch nittso allmächtig sind

und nittso mit allne Geischter vebündet