er isch scharf
häzzi gseit zu siner Frau
wosi uf de Schtäge aatroffe hätt
wosi abe gange isch
i ihres Zimmer
go schlafe

sini Frau isch une im Woonzimmer
für e paar Minuhte ihgschlafe gsi
und iezz ufecho
is Bett

er isch scharf
das häzzi feschtgschtellt
wosi biinem gsih isch
efeimal au über imm
schnäll segis gange
vill seg nid passiert
aber doch nid nüüt

er isch scharf
isch e Feschtschtellig gsih
für iri Fründin
en Hiiwiis uf en dringendi Ufgab
wo iezz na hätt möse erlediget wärde

so sind d Fraue
hätter tänkt
si chönid plözzli
i Schtimmig choh
und plözzli widder
ganz gschäftsmässig wärde
und inn behandle
we wäner känn Mänsch wär
er segi aber ja eigentli
au känn Mänsch