zummglükk
segerso
wenersegi
zummglück
seger nidanderscht
nizzoh we di andere

 

 und i de Nacht woner nid hätt chöne schlahfe

i derä grohsse tunkle Wonig i derä Riiseschtatt

ischer uffgschtande und en lange Gang füre gloffe

und hätt duren Tührschpalt glueget ines Zimmer

und hätt i demm Zimmer e jungi Frau gseh ligge

ufeme Bett wo wenär au nid hätt chöne schlahfe

wo gsühfzet hätt und gschnuhfet und inn gar nid

bemärkt hätt er isch nattürli liislig gsih und

üsserscht vohrsichtig und hätt sich schnäll wider

zruggzoge aber schpähter hätter vill a däh Momännt

tänkt und sihch immer wider vohrgschtellt wasächt

pssiärt währ wäner en chliine Lärm gmacht hetti

wäner echli ghüeschlet hetti oder eifach inegange

wäri und öppis Tumms geseit hetti uf Schpanisch     

er mösis mache

morn mösers mache

und wäners nid weli mache

so möser sihch dezue zwinge

iezz segi de Momännt dah

woners mösi mache

wäners iezz nid machi

dänn verpassi är öppis

schampahr Wichtix

also morn mösers mache

dahs möser sihch iezz vornäh

au wäner di ganz Nacht

nid chöni schlafe dewäge

es gebi nachär lang

kei sone Glägeheit me

und vilicht gebis sis

ganze Läbe lang kei sone

Glägeheit me vilicht

veränderi sihch ja ales

es veränderi sich ja ales

immer soh schnäll also

mohrn mösis sih morn

möser gah unz mache

 

d Lahg
hebi sich langsam
widder
normalisiert 

 

wäner tänki
waser mössti uhsschtah
wäner mittire zsämewär

 

 es segi imm dahs ales

scho zimmli verleidet

emahl wärdi imm dahs

ganz verleide und dänn

wärdi är nüht me mache

und nüht me säge und

überhaupt mit kämm

Mänsch me rede däh

Momännt chömi nächer

dahs märker

 

es gebi Lüht mitteme grohsse Bhellter

und Lüht mitteme chliine Bhellter

und diä Lüht mitteme grohsse Bhellter

mösid immer echli uhfpasse wesi ummgönd

mitt dene Lüht mitteme chliine Bhellter

diä Lüht mitteme chliine Bhellter

neigid zumä gwüssä Nihd und segid mängmahl

echli agressihf aber vilicht segi dahs

es eisihtigs Urrteil und vilicht segis ehner soh

dass diä Lüht mitteme grohsse Bhellter

diä Lüht mitteme chliine Bhellter underdrückid

und uhsbühtid bis si grad gahr nüht me hebid

 si liäbi

dah öpper

si liäbi

hebisi grüeft

si wüssi

nurrnanig wenn

es chömi aber

schona uhs

si märkis

mer seli ire

namel es Glahs

ihschänke dänn

chömis uhs

si selizich

peraht mache 

es göngi dänn

efeimahl schnäll