er hebi eifach inen Topf ine brünzlet

wo im Egge gschtande segi und segi drufabe

vom Wihrt zimmli unsannft usegschosse worde

uf de Schtrahs aber hebi er ganz schaurig

ahfange flueche und hebi di wüeschtischte

Gottesläschterige uhsgschtohsse ali hebid

sihch gwunderet wenen sonen chlihne Mah

so schrecklichi Flüech chön vo sihch gäh

am Schluss heber na grüeft de Tühfel seli inn

doch cho hole de Tüfel seli nur choh nimmi

hätter grüeft nimmidoch es segi es Riihsetheater gsih

bismeren schliessli appgfüehrt hebi er segi na

vor Gricht choh Hans Heinzen heber gheisse

und er segi de Pfyffer gsih vo Appezäll

er glaubi

daser mittem Läbe

langsam chöni abschlüsse

er hebi ales gseh

er hebi ales ghört

er hebi ales gläse

es chöni iezz kei Überraschige me gäh

au die Liäbi nihd

det segi ales verbih

det wärs nurrna makaber

wänn na öppis würdi passiere

imm schiini mängmal ales

nurrna makaber

es segi vo Afang ah makaber gsih

sitte Urziite

es segi es Wunnder

dass das immer ali uhsghalte hebid

es gebi sicher es Gehn

odder irgenden Botestoff

wo d Mänsche befähigid das uhszhalte

Idemm Buech chunnt au e Mildred vor

e Frau wo Mildred heisst

en schreckliche Name segi das

wo aber genau passi zu ire

es segi au e schrecklichi Frau

de Filip verfali ire

und das nüzzi si uhs

und plagi de Filip ganz furchtbar

er glaubi er käni däh Tüppus

er hebi au scho settigi Fraue ahtroffe

aber meischtens heber

ine chöne

uhswiche

wass sinttahs für Wiisheite

wass sinttahs für Wiisheite

mer mösi immer

echli uhfpasse

dass dahs wo-n-ide

Chöpf umegeischteri

ufe-n-unnschedlichi Ahrt

umegeischteri

und dah diä vile unnklahre Vohrschtellige

nid chönid besihtiget wärde

so mösimer ebä versueche

si irgendwie z kanalisiere

und ihzdämme ganzi Parteie segid nüht anders

als settigi Ihdämmigsorganisazziohne

wännsi iri Uhfgahb guet erfüled

im andere Fall chönedzi natürli

au gwaltigi Schäde ahrichte

s Bescht segi glaubi är wänn immer

en gwüsse Lärmpegel dah segi däh verhindere tög

dass sich einzelni zfescht chönid

in Vordergrund rücke

guet segi dahs ales nattürli nihd

es bringi känn Fortschritt es bringi

nid meh Vernunft it Gsellschaft und inn Schtaht

aber es verhinderi wenigschtens dass sich

d Unvernunnft wihter uhsbreiti mer stöchi

diesbezüglich ja na immer grohsartig dah

mer mösi nur de Färnseh ihschtele

dänn gsechimer dahs

was bezwäcksch

was wotsch

was schpinnsch iezz wider

glaubsch erreichisch meh

wännt schpinnsch

jah dahs glaubi

ich erreiche meh wäni schpine

wäni schpine

erreichi immer

dahs woni wott

tönzi iez nid

so huereblöhd

ähr hebi vo chlih uhf
immer s Gfühl ghah
s Läbe mösi en Sinn hah
und iezz gsecher
dases känn Sinn hebi 

ales was passieri
segi es simbohl
und indemm es sich sälber darstelli
dühti es ufs übrige
i dere betrachtig
schiini imm
höchschti ahmassig
und höchschti Bescheideheit zligge

dah chömer
nüme mitt
dahs chöner
nid verschtah 

Währ holttiezzt

d Fäderli

abem Büechergschtell