si hetti us imm

en Schriftschteller mache chöne

är wärs worde

dahs segi sicher

es wär ja au ganz eifach gsih

au wänns vilicht nur

für eis einzigs Gedichtli

glanget hetti

i de Wonig gägenüber flackeret Liächt

und d Heizigsrohr mached en cheibe Lährme

unz Radio laufft me ghört lislig Musick

es gitt nüht womer appschtelle chönnt

au d Luis nihd wo daliht ufem Sofa

und iren Fründ umschlunge hätt und veküsst

nur Bilder vo de Tschoänäh erfüled

min Geischt

es enttwickli sihch nühtme

dahs segi erschtuhnlich

es setti sich doch immer

öppis entwickle es hebi sich

doch bis iezzt immer öppis

entwicklet und es chöni sich

iezzt nid plözzli nüht me

entwickle s Läbe bestöchi doch

us Entwicklig es mössti doch

eigettli iezzt öpper choh

mitteme Uhfruef mitteme Manifäscht

es cha doch nid sih dasd Chrefft

ändgültig erschöpft sind oder

chas dahs gäh es häzz ja scho ggäh

im alte Mexiko ischemahl e Kultuhr

vo eim Tahg uf de ander verschwunde

mer weiss nid wisoh ali händ eifach

ales ligge glah und händ uhfghört

mer hätt Boute gfunde wo Mahler

zmizzt i de Arbet uhfghört händ

di schwährschte Sünd

segi d Tohdsünd gsih

wär e Tohdsünd begange hebi

hebi so schnäll we mögli

möse go bihchte es segi

en gfährliche Zueschtand gsih

wännöpper i demm Zueschtand

vo de Tohdsünd gschtorbe-n-isch

hätter uf känn Fall in Himel chöne choh

sondern isch it Höll choh

idi ehwig Verdammnis und in

ehwigi furchbahrschti Kwahle

und Tohdsünde häzz vili ggäh

wämmer am Sunntig nid it Chile währ

währ dahs scho e Tohdsünd gsih

är segi nattürli immer it Chile

ussert wänär höchs Fiäber gha hebi

dänn hebi är ahgnoh daser entschudliget segi

aber är hebi immer mit Schuhder

diä Lüht ahglueget wonid it Chile gange segid

sini Schuelkamerahde segid nid it Chile

und sin Vatter segi nid it Chile und

sin Brüeder hühfig au nihd und diä ali

segid immer im Zueschtand vo de Tohdsünd gsih

är hebi für sih pättet aber dahs segi

warrschinnli scho faltsch gsih

scho sälber au wider e schwäri Sünd

dänn wänn Gott öpper zur Verdammnis

beschtimmt hebi hebi mer inn

nattürli nid wider chöne beschtürme

er selli sini Entscheide ändere

mer hebi nid tärfe meine

mer segi gschihder als är

es segi es kohmisches Gfühl

wäner tänki daser emahl

jede Sunntig it Chile ggange segi

und deht au mindeschtens eimahl

imm Monet komuniziärt hebi

s Komuniziärä segi öppis Unheimlichs gsih

de Pfarrer oder de Fikahr hebi eim

e Hoschtieh uf d Zunge gleit

und mit derä chlihne wihsse Schiibe Broht

hebi mer es Stückli vom Liib vom Jehsus

imm Muul ghah und dadermit vo Gott überhauppt

mer hebi soh en Zueschtand

vo vollkomener Gnahd erreicht

wämer i demm Zueschtand gschtorbe währ

währ mer sofort in Himel choh

si hetti us imm
en Filmreschissör mache chöne
är wärs worde
dahs segi sicher
es wär ja au ganz eifach gsih
au wänns vilicht nur
für es chliises Superachtfilmli
glanget hetti

bi all demm
hebi niä vill
useglueget
es hebi sich
nüht Grosses ergäh
nur tumms Züüg
im beschte Fall
öppis Mittelmässigs
öppis Halbbatzigs

wäner die ali uhfzellt
dänn märktmer
daser tänkt
das segis ales Tubeli gsih

das segid ales

chliini Lühtli

hätter gseit

d Frau Beträchtlich
d Frau Nei
d Frau Liebernihd
d Frau Keiziit
d Frau Nei-Ummgotzwilenei
d Frau Üsserscht
d Frau Achtmal
d Frau Sugg
d Frau Fasnacht
d Frau Höruhf
d Frau Brödeli
d Frau Pünktlich
d Frau Läppt
d Frau Zue
d Frau Läpptnihd

es bizzeli vilicht scho
aber insgesammt
und es isch glaub niä
zumene Punkt cho
nei übetrhaupt nid

immer

wänähr

si gsechi

tänki är

we isch

dahs möglich

das öpper

soh schöhn

chan sih

immer

tänki är dahs

jedesmahl

är wüssi nihd

weli Tage schönner segid

diä Tage wo si dah segi

oder diä Tage wosi nittah segi

wännsi dah segi segis

fascht scho z schöhn

wännsi nittah segi segis

au fascht z schöhn

diä Tage hebid au en

fanttastische Reiz

är segi dänn soh verlohre

är wandli dänn

soh nähch am Appgrund

dases gwaltigi Chrefft

frejsezzi i de Appsännz ligi

womögli meh Glück

als i de Presännz dahs hebi

de Pruhscht gseit däh segi

wenär en grohsse Appsännzschpezialischt gsih

en Appsännzkünschtler wonamändi

nurrna i de Appsännz gläppt hebi

und nüme i de Presännz daderbi

mösimer schochli uhfpasse

är luegi drumm das au d Presännz

nid ganz undergöngi auwänndahs

unnghühr schwirig segi und womögli

na schwiriger als dahs

wo de Pruhscht gmacht hebi

si hebid lang

ales uhsghalte

aber iezz

haltizis

nüme-n-uhs

di iezzige

Modernisierig

göngi zwiht

si überschrihti di

anttropolohgische

Möglichkeite

es segi ja

scho lang ales

zum zerrihsse

gschpannt gsih

iezz zerrihssis

iezz sex färtig

ich han au

negativi Erfahrige gmacht

de wahnsinn
segi immer dahgsih
de wahnsinn segi au scho
nünzäfüfedachz dagsih
und au scho
nünzäfüfefüfz
und wiit verbreitet au
nünzäfüfesächz