vo imm uhs gseh

seged eigettli ali andere

schmudeligi gruusigi Lüht

nid ganz ali

aber fascht ali

es gebi au settig wos nid sind

und diä segis dänn

imene ganz unerchlärliche

und apsoluht beunruhigende Uhsmass nihd

es segi we im Militär

es gebi nu ein Trohscht

dä Trohscht segi

dass d Ziit vergöng

unz immer emahl es Abträtte gebi

si chönid d Ziit nid ahalte

zum Glück nihd

wämmer nämmli Ziit chönnti ahalte

dänn würdid ali diä

Inschtituziohne und Organisaziohne

Ifluss uff Ziit näh

und inn demit definitif gfange sezze

dänn wärär anärä Sizzig

und chönnti hundert Jahr lang nid wägg

tuusig Jahr lang nid wägg

wills denä wo d Sizzig abhalted

so gfallt si würdid ewig sizze

wännsi chönntid und würdid inn

nid la gah es währi niä färtig

aber soh segis iezz ebä emahl färtig

es gebi en Vormitahg und villicht au

en Namitahg aber nid meh

de Zeiger rücki vohr und es wärdi

vieri oder feufi und Züüg farid

und d Lüht wärdid müed

und schtellid kei Frahge me

es chömi soh immer zumene änd

es segi immer ales emal färtig

dahs segi en grosse Trohscht

dahs mösimer doch emal feschthalte

er hebi tröimt

dass si imm

nüme Grüezi gseit hebi

si segi a imm verbii ggange

und hebi imm nid Grüezi gseit

är hebi sihch dänn äxtra umträit

und segi schtillgschtande

und hebi ire namahl Grüezi gseit

aber sih hebi nüht gseit

und hebi inn au nid ahglueget

und er hebi nid gwüsst wahs mache

und er wüssi au jetzt

na immer nihd was mache

wüssezi was

göndsi doch

scheniäräd

si sich nihd

belücht

ales

mit dim

Liächt

Habibi

heissi

uf arabisch

Liäbschti

oder Liäbschtä

Habibi chunnt vill vohr

i irne Liäder

mer mues nur gnau lose

i dene ändlose langfädige

Gsäng tauchts immer wider uhf

es tönt meischtens zimmli dramatisch

Habibi rüefez wiä wänn ales

vo somene Habibi abhange würdi

är chöni sich dahs gar nid vorschtelle

dass dah überhaupt vill Gfühl

chönid vorhande sih dä Habibi

sizzi ja nachhär nur im Kafi

und lösi d Fraue dihei chrampfe

und losi de Gsäng zue im Radio

diä Ziit wosisich Habibi sägid

segi extrehm churz tänki är

im Unterschihd zu öis wos doch

mängmahl echli lenger gaht

es segi imm na öppis ihgfale

zu dem Gedicht woner hütt gmacht hebi

bissigä Tüüfel dahs hetter gärn na

inegfüeggt es hetti guet passt

aber är segi mitt so Bezeichnige

zrugghaltend si segid imm z agressihv

är wetti versueche wäggzcho

vo dene Bohsheite langsamm wetter wäggchoh

vo dene endlose Grausamkeitte

es segid ja ales Hirichtige

es segid ales Folterige und Verbrännige

es segi es Glück dass sich ali

diä bissigä Tüüfel immer

gägesiitig in Schach haltid

und käne elei cha mache waser wott

suscht wärs bi öis nid anderscht

als im Kongo oder in Nordkoreah

käs bitzeli anderscht

mer mösi an Lehnihn tänke

de Lehnihn segi au nid depressihv worde

und ähr hetti doch ale Grund dezue ghah

es segi doch ales ganz anderscht choh

allser tänkt hebi es segi ales ganz faltsch choh

under hebi doch aunid uhfgäh er hebi wihtergmacht

und kämpft und vili Lüht verschühsse lah

bisimm d Ahschträngige zvill worde sind

unzzimm ähderli im Hirni verjaggt hebi

bisersihch nüme hebi chöne bewege und

biser nühtme hebi chöne säge und imm Rollschtuel

umegschobe worde segi under hebi möse demitt rächne

dasen de Schtahlihn na ummbringt

wenes böhses Gschpängscht heber uhsgseh

wohär ächt

däh Zueschtand

chömm diä Chrankett

diä Lähri diä Nacht däh Tohd

segis ächt wills Winnter segi

oder segis ächt wäge öppis anderem

seger ächt uhsprännt und zwahr änttgültig

heber dahs gseit woner hebi möse säge und möser iezz schtile sih

oder fähli imm eifach irgenden Safft

oder halters eifach nüme uhs i siner Wält

wetter nöimetanderscht sih wetter öpperander sih

fählis imm a Ihfluss wetter ächt en König sih en Tirann

en Komandannt oder en Komissahr mittere schwarze Läderjagge

und mit Proschtituiärte wetter en Tühfel sih und chönis nihd

fählis imm ächt anere Frau heber ächt di faltsche Frau

heber ales faltschi Fraue um sich ume

gebis für inn gahr kei richtigi Frau seged ali Fraue uf de Wällt

für inn faltschi Fraue seged ali Männsche uf de Wällt

für inn faltschi Männsche ummöglichi kabutti langwiiligi

oder loser ächt nid di richtig Musikk heber

niäh di richtig Musikk gloset segi de Dilen nizzrichtig

hälffi ächt iezz de Tschimi Sgott

öb ächt däh hälfi dahs frähgi är sich är losi

sitt geschter nurrna Tschimi Sgott

allti Mane machid warrschinnli di gröhschte Kunscht

wänn eine emahl füffzg oder sächzgg Jahr Pra xiss hebi

und Widerschtand gleischtet hätt und füffzg oder sächzgg Jahr Chummer

und Enttühschige und Empehrige uhsghalte hätt

dänn finder mängmahl de richtig Tohn

dänn chömi zmizzt im Truhrigschte ine zmizzt i allne Chlage

s Schönschte zum Vohrschih

dänn singer unänntlich schöhn

dänn reder schöhn und schrihber schöhn

eim sori dätt ei meid juh krei singer dänn

wämer brüeli mer mösi nämmli brüele wämer diä Töhn ghöri

d Trähne laufid eim nurrso abe soh truhrig segis und so schöhn

es segi s üsserschte wo eme Mänsch erreichbahr segi

holding back the years singer

und es segi we wänn en ängel singe würdi

holding back the tears

nüht chöni guet wärde singer nüht hebi e Schannse guet z wärde

es göngi immer ales kabutt es göngi immer ales zgrund

nothing had the chance to be good

and nothing ever could

und ales wirt vonere Trommpehte umschpillt und ihgrahmt

und verschtärkt und vomene fihne Piahno

und im Hindergrund gizz en Bass und es Schlagzühg

öbächt diä Musik s richtige segi für inn

oder öpps ächt nid a de Musik liggi sondern a demm woner läsi

läser ächt s Faltsche öber ächt s nühnhundertsihtige Buech

über di russische Revoluzziohn nid hetti sele läse

öb ächt di russische Gschicht für inn z gfährlich segi

öb ächt di ganze Gschicht für inn z gfährlich segi

öber ächt nüht Hischtohrisches me setti läse

und au grad nüht me Filosofisches und kei Litterathur me

höchschtens vilicht na Göhte Göhte hebi imm eigettli na niä gschatt

aber vilicht segiz ja au d Zihtige wo schadid

vilicht schadi di Frankfurrter Allgemein oder vilicht de Tagesahzeiger

oder öb ächt ales schadi öb d Fraue schadid und d Mane

öb ali Musik schadi und ali Büecher und Zihtige

öb ächt

ales schadi

und ales

inn töhdi 

isches
unnerrträglich
jah esisch
unnerrträglich

Er hebi Tulppe gholt

roti Tulppe

mer chönis sälber apschnihde

ide Nähchi segis

föif Minute mittem Auto

si choschtid siebezgrappe

aber är hebi weniger zahlt

är hebi nur sovill zahlt

wener tänkt hebi

dases richtig segi

daser zali

mer mössti es Gedicht mache

für ali wo falsch läbed

schtell dir vohr

mer mössti Vohrstellige

vom Läbe uufrächt erhalte

aber wiä wotsch dahs mache

mitt wass für Wohrte

und wass für Bilder

und vo wasfüreme Läbe dänn

vo welem Läbe wellimer

Vohrschtellige uufrächt erhalte

vo demm uhfgschwullne Läbe

vo demm pompöse Läbe

wo dah gläppt wärdi

segis jedäfalls nid nöhtig

vill dichterische Uufwand z betriibe

mer mössti lang sueche

bismer sones Läbe finde wühr

aber dänkbahr isches ja

dases sones Läbe gitt

ummöglich isches nihd

was isch

iezz lohs

was isch

iezz scho

wider lohs