aber mer tärfi nid glaube
dases immer eifach segi
Gedicht z schriibe
d Achmatowa segi äxtra
z Russland blibe
will si gschpührt hebi
dases iri Beschtimmig segi
Unnglück uuszhalte
möglichscht vill Unnglück
ungghührs Unnglück
si hetti chöne uuswandere
aber dänn hetti si kei Totechlahg
chöne schriibe und käs Reckwiemm
Bajonettstiche 28
Revolverschüsse 5
hättsi gschribe und Blut liebt
sie
und immer Blut unsere russische
Erde
es schiini imm dasd Tichter
e Begleiterschiinig segid
es gebi si zu allne Ziite
aber am iidrücklichschte trättid si
i de grosse Kattasschtroffe uhf
deht chönid si schreje und truure
und sälbschtversschtändli au hasse
und liäba Sälbschmörder liäba und
verhafteti Kämmpfer und Söhn i Zwangslahger
i Fridesziihte segid si weniger zahlriich
und me ghöri si au fascht nüme
und diä womer ghöhri segid langwiilig
aber är begriihfi deshalb d Achmatowa
gliich nihd si hetti z Americka
sicher au na chöne öppis dichte
und mitt Läsige Gältt verdienä
mer tärfi sich wämmer Tichter segi
nid so vo sine Ziitummschtände beschtimme lah
mer tärfi sich nid soh mittem Böhse befasse
und s Böhse mitt Gedicht na reize
de Schtahlihn wär warrschinnli
weniger grausam gsih
wänn diä Dichter weniger luht gsi wäred
weniger furchtbahr i irne Ziile
und weniger böhs bi de Wahl vo de Tittle
