sisch da sovill bschisse worde
iezz wei si vill meh
Personekontrole mache
diä schtigä dänn i Zivilhudle      

 

lisisch
was
d Judit Böttler
schriibt                     

öb ächt d Zahl

e Role spili

öbmer unbedingt

vili mösi hah

we dä Brächt

oder dä Bärgmann

oder öbs ächt au

mitt einere gaht

oder mitt zweine

 

mer schriibed öis
kä Brief
mer settid eigettli
au suscht
nüht schriibe
und au nüt säge

 

früener hebid si na vill meh gchoderet

mer hebi eifach an Bode gchoderet

mer hebi immer möse uhfpasse dasmer nid

inen Chöderlig inegschandenisch

wänneinä en richtige Choder im Muul gha hebi

heber demm en Grüene gseit und segi

fascht na schtolz gsih druff

es hebid ali immer e Schnudernase ghah

oder öppis imm Hals

si händ nur es bitzeli möse hüeschtle

dänn händ si scho en Choder peraht ghah

und händen dänn so wiit we mögli gschpöizt

mängmahl a eine ane an en Chliine

usere undere Klass oder suscht eim

ad Jagge oder is Gsicht sodas ali

umegrännt sind unz verzellt händ

lueg deht er hättem

grad en Grüene

ad Jagge gjaggt

 

mer schriibed öis
kä Brief
mer settid eigettli
au suscht
nüht schriibe
und nüt säge

Schurni si
mös furchbahr si  

 

Er chömi scho na
Er schriibis scho na
Warted nuhr
Hätter grüeft
Ir wärdez na erläbe
Er segi nur nanig peraht
Er mösi vorhär na
Anderi Kapittel odder Bänd schriibe

 

widder seger i de Nacht lang wach gsi,
widder hebber nid chöne schlafe,
es segi das ales so schändlich,
ales so nidderträchtig,
ales so erbärmlich,
und gliichziitig au tottal apsurd.

 

 

öb är
iezz auna
glücklich
schtärbe mösi

si wüssid au

dahs ales nur glogenisch

nur läri Wohrt

drühmahl nüht

beschtefalls sinz Zaubersprüch

anderscht isches doch

nid z begriife

aber si reschpäcktierid inn

wiler so lüge chönn

wiler sovill wüssi

si glaubid er seg en Häxer

wo soh häxi

dasmers nid chöni bewiise

wo soh häxi

das ali glaubid

es göngi um öppis Humanitährs

 

 

das wär nid nötig gsi
hätter grüeft