wänn
wärdezzis
märke    

 

 

er hätt d Fraue ihteilt ghah
i settig
wo gärn vo Huere grett händ
und i settig
mitt dene är uff känn Fall
vo Huere hett chöne rede

vom Kafka
chöner nüüt lehre
ehner dänn na
vom Schtrindbärg
aber läse
töger doch dänn
liäber de Kafka

 

 

gärn hänzz immer widder
vom Schtrindbärg grett
und glachet
däh segi en arme Siech gsih
sini Frau heben schauderhaft behandlet
es göngi imm mängmal au so
er wärdi auso behandlet
we de Schtrindbärg
sini Frau schtrindbergeli hüfig

är wetti gärn

wideremahl

uf en Tanz gah

uf en richtige Tanz

uf en Fasnachztanz

womer scho wuchelang vorhär

uhfgregt segi und

womer nachär

nid chönn verschtah

we sihch ali soh

hebid chöne benäh

är segi emahl

amene Fasnachztanz gsih

wo soh verruckt tah wordenisch

dasers niämeh chöni vergässe

diä Fraue wonär

deht gseh hebi

hebid warrschinnli

au i irem ganze Läbe

nur eimal so verruckt tah

so schampahr tah

und hebis iezz

sicher vergässe

erhebi

mittkämmänsch
sovill
schönserläppt
wemittire