Dänn hämmir deht
Es Chalbsgottlett gha
So öppis feins

 

 Meyer mit Ipsilon

segi en guete Name,
Meyer mit Ipsilon töni vornehm,
töni besser als Meier mit i,
Meier mit i segi öppis sehr Gwöndlichs,
Chlibürgerlichs, Schparsams,
Meyer aber, mit Ipsilon,
töni vill besser
da fali eim de Konrad Ferdinand Meyer ih,
das erinneri eim a riichi Zürcher Familie,

en berüemte Meyer segi übrigens au de Russ Meyer,
er hebi ali Film vo demm gseh,
d Meier mit i würdid sicher im Durchschnitt
vill weniger verdiene als d Meyer mit Ipsilon,
er hebi e Fründin gha,

wo Meier mit i gheisse hebi,
binere Hüraht hetti dä Name guet zu imm passt,
si eigene Name wäri damit definitiv unmögli worde,
Meyer mit Ipsilon heber kei kännt,
Meyer mit Ipsilon hebid inere andere Wält gläppt,
e Meyer Ipsilon hetti gar nid zu simm Name passt,
e Meyer mit Ipsilon hett in sicher au niämals ghüratet

 

dein Hals ist wie

ein Elffenbeinen thurm

deine Augen sind wie

die Teiche zu Hesbon

am Thor Bathrabbim

deine Nase ist wie

der Thurm auff Libanon

der gegen Damascon sihet

dein Heupt stehet auff dir

wie Carmelus das Har

auff deinem heubt ist

wie die purpur des Königs

in falten gebunden

 

 ah
shättmerdoch
weläsih

 

 es chönnt au sii
das mir ali scho i de Höll sind
inere schpezielle Vorhöll
imene erschte Kreis
wo öis de Tüfel vergässe hätt
oder vilicht uhfbewahrt
für ganz bsunderi Quale
für de Fall
das imm das ewige Brätle und Fürle
das Ufschpiesse und Süüde
emahl langwiilig wirt
und er Luscht überchunnt
für öppis ganz Verruckz  

das segi hirnverbrännt gsih
hebi si zu imm geseit
so öppis hirnverbrännz
hebsi na nie erläppt