er segi

echli es Monschtrumm

er chöni

i de schwirigschte

Sittuazziohne läbe

es töhdi inn nihd

aber öpper ander

däh chönnti debih

scho übereschnappe

 

er wetti nihd
dass sich diä
Protäschte
uhswiited        

 

ganzamafang
hänzz de Flaggo Chimenez gseh
mittere Handorgle
mexikanisches Züüg
dänn isch de Rei Kuuder cho
mittem David Lindley
e Schtund lang hännz zäme
gschpillt und gsunge
ganz wunderbar
si sind ine aber schpäter
ganz chlii vorchoh
wosdänn losggange isch
ganz unerwartet
de Saal ischna läär gsi
häzzich aber schlagartig gfüllt
wo de Himmelsbewoner erschine isch
und ali verwandlet hätt

 

für inn segi dahs

sonen Horohr

däh Verfall

aber anderne

gfallis

anderne chönis

nid schnäll gnueg gah

anderi hassid

ales Höchere

ales Schwirigere

es schtöhri si

wänn sich eine

echli gwählt uhsdrucki

 er hebi
Tschöhnheitt
troffe
er segi
de Schöhnheit
begegnet
und zwahr
de echte
de grohsse
de sälltene
es segi verruckt 

ER hätt gseit
Es wärdi Liächt
Und es hätt Liächt gäh
ER hätt gseit
Es wärdi Schlagzüüg
Und es isch Schlagzüüg worde
ER hätt geseit
Es wärdi Gittare
Und es isch Gittare worde
ER hätt gseit
Es wärdi luuht
Und es isch luuht worde   

 

de Willhantäll

was würer ächt säge

wäner wider chiem

was würer mache

wäner vo simm Dänkmahl

würdi abeschtihge

würer ächt säge

dasär gahr niä gläppt hebi

würer sich ächt entschuldige

daser dah isch würer ächt

öisi Hischtohriker go bsueche

i irrne Expärttekomissiohne

würer ächt öppis wilz rüefe

und d Ahrmbruscht schwänke

und d Pfihle us de Bruschttäsche näh

wärer ächt echli enttrüschtet

würer sich angaschiärä

würer e Schtifftig gründe

würer sich ahpasse

oder wärer ächt nid ahpassigsfähig

würer sich nid zrächtfinde

wärer enzzezzt wär imm

dahs ales en Horrohr

würer Gschicht wele nöi schriibe

wärer ächt i de Opposizziohn

oder wärer ebä grad nid

bi de Opposizziohn

würers märcke

würer duregseh

oder würer nid duregseh

und zum Färnseh gah und it Färie

ines Luxusshottel z Paris

oder in Saudiarabieh

oder würer en Undergrundarmeh gründe

mit Fanttasihuniforrme wahs hetter ächt

füren Inteligänzkwozziänt

chönnter nur got Schtrahsse wüsche

und nur Biär suufe

würer sich ächt für d Schwiizergschicht

interessiärä oder würer säge

dahs segi doch ales Blöhdsinn

würer säge daser nid vo sim Sockel

abegschtige wär wäner gwüsst hetti

daser sovill tummi Siäche würd ahträffe

wärer liäber wider i simm Tohteschlaaf

würer säge iezz seger sowiit

daser sogahr de Tälleschuss beröii

är hebi nid dahs erreicht

wo hetti sele erreicht wärde

es segi öppis ganz anders entschtande

öppis völlig Verruckz

är lachi wänär dahs gsechi

är de Willhantäll

aber es lüchti imm ih

was da gseit wärdi

es segid nid eifach

konserwatifi Spinner

es segid Lüht

die verdammt vill

vomm Läbe verstöchid