ihres Prinzip segi
Tummheit für ali

 

plej fäcking laud

hätter gseit

nid is Mickrofohn ine sondern zrugg zurr Bänd

wo The Band gheisse hätt es isch nid nu e Bänd gsih

si hätt au dä Bähnd gheisse mittere ganze normahle Mänscheschtimm

hätters gseit plej fäcking laud ganzz gwöndli und nid

mitt sinere Tühfelsschtimm nid mitte Schtimm vomene wüetige Dämohn

ganz kuhl als Arbezahwihsig

er hebi scho lang en Uhfnahm vo demm Konnzärt und hebi si scho vill

gloset es segi ja ganzes legendährs Ereigniss gsih

er hebi däh Sazz niä ghört erscht iezz hebers ghört

iezz woner gnau uhfpasst hebi

iezz heber gwüsst dass däh Sazz gseit worde segi

inere Beschprächig segis gschtande es hebi iezz vili Beschprächige

ggäh will erscht iezz e ofizielli Uhfnahm usechoh segi

bis iezz segimer uf Raubkopiie ahgwise gsih

au ähr hebi sone Raubkopiih aber iezz segis ofiziell usechoh

ufere Zehdeh wobih es iezz nüme es Konnzärt in London segi

sondern es Konnzärt in Männschester play fucking loud

heber nid i de Roiel Olbert Hohl gseit sondern z Männschester

irgendwoh inere Hale wos iezz vilicht gahr nüme gitt

inn hebis erschtuhnt

erschtuhnt dasers bis iezzt i alldene Jahr niä ghört hebi

daser offebahr niä richtig gnau gloset hebi

und inn hebi d Schtimm erschtuhnt diä Rueh inere Schtimm

wo grad drufabe en Rihsezorrn usdruckt

en acht Minuhte lange ungghühre Zorrn

en Zohorrn

vilicht isch däh Zorn gar nid eso grohss gsih

wes de Ahschih macht vilicht

hätter überhaupt känn Zorn ghah

vilicht isches für inn es ganzes gwöndlichs

banahls und langwihlix Konnzärt gsih

 

 em Schtrindbärg isches dräckig ggange
sini Frau hätt imm zum Zmittag
nur en Täller mit Chnoche häregschmisse  

 

iezz heber sich beruhiget

und zum Beruhigtsih ghöri

s Schwige iezz schwiger

er schtelli fescht

daser imm beruhigte Zueschtand

sohzäge mösi schwige

es chömimm nämmli nüht me innsinn

er tänki au nüht me

es segi schtill worde

under wüssi nid so rächt

wasdervoh zhalte segi

 wäner nizzo tumm gsih währ

nizzo ghämmt nizzo unnbekannt

wäner weniger Püggel ghah hetti

a simm Chini wäner sich echli besser

hetti chöne uhsdrücke dänn währer

iezz scho tohd dänn hetter

nämmli Ejz überchoh  

 er bätti

das ali

verfluecht

wärdid

aber es

segid ja

scho ali

verfluecht  

 

 

das Wohrt fäcking segi es schöhns Wohrt

under beduhri dases imm Tühtsche

nid öppis Entschprächenz gebi

fäcking das wührer hühfig bruche

wänner Amerikahner währ wär bi imm jedes

zweite Wohrt s Wohrt fäcking

 

Muesmersich
Sorge mache
ja
mermuessich
Sorge mache

Muesmersich
Sorge mache
nei
mermuessich
kei Sorge mache

 Das is aber au
e furchpari Gsicht gsi
woner da
in es Käferli
verwandlet worde is

 

 es lösi sich nid beschrihbe

mer tärfi sich dadrüber

kei Illusiohne mache

ali diä vile Zäddeli

nüzzid nüht mer gsechis

ja vo sit langem er schribi

immer nöii Zäddeli und

meini es hälffi meini

es bringi öppis aber

ales womer vo dene vile

Zäddeli und Chährtli und Papihrli

lehre chöni segi ebä grad dahs

dases sich nid beschribe lösi 

 mer chöni di moderne Kunscht besser verschtah

wämmer iri Funkziohn ahluegt

we viles andere segi si dah

zur Entmuetigung und Abschreckig

si wärdi produziärt umm de Lüht s Gfühl zgäh

si verstöchid nüht und si segid Tuble

oder segid kei Tuble aber chönid nüht mache

gäge diä Ummängi vo andere Tuble wos überahl gebi

und soh wärdi jede schtill wo ines

Museumm für moderni Kunscht göngi 

 hättächt
d Eulach
na Wasser
und was macht ächt
de Mattebach
we gsehts ächt
deht uus

 

 es segi nid
Zaipruss Awenou
es segi d Lindbergschtrass    

 

sisch nid uuszdänke
was chönnt passiere
wänn

 

er luegi mängmal
im Büro mit Blicke um sich
wo niämärt früener
imene Büro für möglich ghalte hetti

 

 

schtirb

schtirb uhs

schtrib änntli uhs

ich schtirbe ja scho uhs

so schtirb echli schnäller uhs

es giengti doch na schnäller

es giengti schnäller

aber ich wett doch

echli würdig

veschwinde

es chunnt nid druffah

wett verschwintsch

es chunnt weissgottnid druffah

 

öppsi wetti

öppsi göngi

öppsi tänki

öppsi machi

öppsi chömi

 

er segi Arischtokraht

er glaubi a Underschihde

er segi nid gärn under Lüht

er weli Dischtanz

aber dadermit weler nüht Negatihfs gseit hah

es göngi nid um Wärtturteil

für inn gebis kei Wärtturteil

es gebi nüht Höchers und nüht Nidrigers

kei übermänsche und kei Undermänsche

es gebi nur Ahrmi nur Verunglückti

nur Wäggentwickletti und Verchehrtentwickletti

es segid ali schwähr undert Redder choh

vo deht hähr gseh segid diä wo früener als höcheri Exischtänze

gultte händ ebä gahr nid höcheri Exischtänze sondern eifach di

amm meischte Verunnglückte di Kabuttischte und Läbesuntauglichschte

diä mitte falschischte Vohrschtellige de faschischte Bilder im Chopf

mer seli nuremahl diä Liäbesvohrschtelige näh und diä Liäbesbilder

nach dene Vohrschtelige hebi käne chöne läbe

a dene Vohrschtelige hebiz nur wansinig glitte

und mit dene Vohrschtelige hebezesich beschtefalls

au chöne tröhschte und über Wasser halte

aber gfale tögiz imm diä überzüchtete

si hebid en Unterhaltixwärtt

är wüssti nid so rächt

wahs mache wännses

nid ggäh hetti

 

 Er hebi nattürli gar kei Plän
und gar kei Uhssichte
wänns imm guet göng
dänn seger ganz vo de Gägewart erfüllt
wänns imm schlächt göng
dänn verfluechi är scho d Gägewart
und erscht rächt d Zuekunft      

 

ghörezzi öis
jah merghöredöi

 

bisch zwääg
jah ichbinnzwääg
sinnderzwääg
jah mihrsinndzwääg   

 

öber ächt e chlihni Ahnig hebi devoh

wassini Rehde bedühtid öber wüssi

wases segi wo redi öber wüssi

dasnid ähr redi sondern vili anderi

sinn Vatter und sini Mueter

und de Vatter vomm Vatter

und d Mueter vomm Vatter

und de Vatter vo de Mueter

und d Mueter vo de Mueter

und vili Vättere und vili Müettere

es ganzes Jahrhundert redi

aber nid s zwännzigscht nei

s nünnzäht Jahrhundert redi

haupptsächlich aber au

na wihteri Ziite ganz anderi

mängmahl tänker er redi

wenen Uhrmänsch soh hebid

sicher d Uhrmänsche grett

 eini vo de schönnschte Schtelle

segi deht wo de Babahr Vatter wärdi

woners im Schloss nid uhshalti

und nid chöni zuelose und zueluege

sondern use mösi ufem Welo fahre

übers Land und dänn uss de Färni

Kanoneschüss ghöri vomm Schloss här

de Chind heber dahs vill vezellt

und immer heber möse uhfpasse

dassi siner Schtimm d Rüherig

nid hebid chöne ahmärke über

demm Elefannt wo dah diä Kanoneschüss

ghört und nattürli i di gröhscht Uhfregig

grahtet und soffort zruggrahst

zu de Tschelesste und zu de

Chrankeschwöschtere wonimm scho

gsundi und schöhn gwickleti

Drillinge tönd entgängeträhge   

 

 

mir sind demm
völlig hilflos
uhsgliferet

 

Wänn?

Jezz!

 

 

was mues dä da iezz na da umefahre
was mues dä da na telefoniere
was sitzt diä da iezz na da
was mues dä da iezz na die Gleser umeträge
was mues dä da na schtändig trinke
was mues dä deht sini nacktige Füess
uf de Sitz gägenüber schtele
was mues dä schtändig suufe
was mues diä da iezz schriibe
werum isch dä deht nanig gschtorbe  

 

es segi furchpaar
was passiäri
aber das chöni garnid anderscht sih
es hebi scho immer vili Spinnsieche gäh

 

d Sünd segi weniger schwähr

wämmer öppis schrihbi

wo unnverschtändlich segi

 

 öbsi dänn zfride währ

wänn ales eifach währ

wänn ali glihch tumm währed

ali glihch beschränkkt

ali glihch hässlich

öbsi dänn zfride währ

oder öbsis nid vilicht liäber

echli differänzierter hetti

öbsi nid wetti interessanter sih

als di andere öbsi nid wetti

das ire eine seit si segi

tuusigmahl interessannter

als ali andere und tuusigmahl

schönner und öbsi nid wetti

useghobe wärde verherrlicht    

 

mer hebi nüht chöne gseh

es segi ummögli gsih

irgendwelchi Underschihde

feschtzschtelle abert Zauberer

hebiz gseh und segid ali

eischtimmig zum gliiche

unnumschtöhssliche Schluss

choh und ali händ guet drah

tah au zu demm Schluss zchoh

 

es segi widder dramattisch er segi widder wiht entfärnt

vo simm Ideahlzueschtand und er mösi widder nöji Technikke

entwikkle umm sihch ihzrichte umm i dere Entfärnig z läbe

züberläbe diä Entwikklig vo immer nöie Technikke nuzzi inn app

er währdi nid besser deduhr er lehri scho öpppis aber er chöni

dahs woner lehri immer nur churzi Ziht bruche dänn chömid widder

nöji Ummschtänd und er mösi sihch widder ummschtelle es fangi immer ales widder bi

Null ah es gebi känn Fortschritt und er wetti doch

echli Fortschritt für wahs läbi mer dänn wännnid für e Entwikklig

aber es gebi kei Entwicklig es dräji sihch ales im Kreis es segi

ales ei grohssi Schihssi wo sihch langsamm und mitt konschtantter

Gschwindigkeit dräjt und diä Lüht wo i dere Schihssi schteckid

märkid nüht gsechid nüht und hebid iri feschte Vohrschtellige

 

 

eini hätt im gwunke
er hetti chöne zuenere gah
ufe in erschte Stock
au im Undergschoss häzz Fraue ghah
schpäter
woner widder verbii cho isch
häzzi imm namal gwunke
und imm auna grüeft

 

tärfi bitte
daderzue
na folgendes säge

 

 

Mer tärfi nid zvill halte vo de Schwiizer
si segid nid besser als die andere
si hebid nur meh Glück ghah
ganz gottverdammt vill Glück
aber d Mänsche segid ali gliich
in Uganda oder Indie oder Griecheland
oder Tütschland oder China
si segid ali unvernünftig, ali Räuber ali Tier
e Chatz hebi meh Verschtand
es segi es Wunder
dass si sich nanig uhsgrottet hebid
ja würklich es Wunder

 

 

isch si ächt iezz wägg
häzzi ächt iezz en andere

 

 

und emal hätt en Nazzionalrat
wo immer gärn grossi Schpäss gmacht hätt
mitt ire übers siis und ihres Alter grett
und gseit da chöni doch na öppis passiere
es segi nanig z schpaat
mer sägi doch immer
«Wänn en alti Schüür brännt»
si isch furchpar beleidiget gsi
und hätt sich chuum me chöne erhole

 

gahz elei

gahz elei

oder gahz

nihd elei

gahz nihd

gahz nihd elei oder

gahz elei

 

es gebi anttropolohgischi Konschtantte

wo furchbahr segid womer chönnti verzwihlfe

wämer sihch demit befassi unzzi am eigene Lihb gschpühri

imm eigene chlihne beschrängkte Geischt

aber mer verzwihfli nihd es gebi ebä

au Konschtannte wo verhinderid

dasmer verzwihfli

är mösi uhfhöre

mit all demm Zühg

är lehri nüht me

es ermüedi inn nuh

es schtossi inn app

und machi inn deppressiv

es choschti inn nu Chrafft

 

 

vilicht hätt de Nihtsche

doch rächt ghah woner gseit hätt

diä Vohrschtelige vo Liäbi

bringid d Fraue ganz durenand

und nemid ine ali höchere Pherschpektihve ewägg

si nämed aber warrschindli au de Mane

einiges ewägg tänki ähr ähr gsechis

bi sihch sälber ähr segi mängmahl

uhsgschproche redduziärt

 

mängmahl tänker

dasmer ali nid grohs verschide sind

vo dene wodah beschribe wärded

wewänns Affe währed

mängmahl tänker

dasmer ali eifach echli

e besseri Schtrattegih hebid

e dur viertuhsig Jahr dure schtändig

verbessereti und perfekzionierti Schtrattegih

wo dezue füert dasmer iezz so überlegä erschihned

so unäntlichvill höhcher sohwe Halbgötter

debih segidmer glihch genau glihch au mihr machid

nüht anders als öis ihrichte

inere appsurde und sinnlohse Wält

händ öisen Tschob erfinded öis en Tschob

mached öis unenttbehrlich verbinded öis

mitt andere wo sich unentbehrlich gmacht händ

und mit nöie wo sich gährn wettid unentbehrlich mache

und gihrig ales ablueged womer vohrfüered

wämer Tummheit chönnti mässe untt Appsurditäht

so würdi mer bi öis nid weniger Tummheit finde

und nid weniger Appsurditäht

als im Innerschte vo Afrikka

ehner meh

lisisch Wittgeschtei
lisisch Sonnemann
lisisch Schpängler
lisisch Husserl
lisisch Laggan

lisisch Jünger

lisisch Burdiö
lisisch Derrida
lisisch Fuggoh
lisisch Flohbär
lisisch Sartrr
lisisch Serres

 Sini Mueter hebi immer ales wele schriftlich feschthalte,
wosemahl amene Gmüesgarte verbih choh sind,
wos es chliises Mürli ghah hätt,
ohni Gländer,
und mer hetti chöne öppe en Meter abegheie,
häzzi wele ufschriibe,
dass das gfährlich segi,
dass da Lüht chöntid en Misstritt mache
und siich schwär verlezze
wänn si Schnittlauch ahpflanzed

Au er weli immer ales feschthalte,
er weli feschthalte,
dases zimmli wahrschindlich segi,
dases uf de Sune zu schtarche Eruptione chönnti cho,
bi dene Milliarde Tone Plasma hochgschlüderet würded
wos Magnetfäld vo de Ärde chönntid lahmlegge und furchpari Schäde aarichte,
en langfrischtige Schtromuhsfall,
er weli feschthalte,
dass dänn en grosse Teil vo öisere Zivilisazion zämebräche chönnti.

 

aber wänn si siich

e chli entfernid vonenand

bim Choche oder Puzze

so tögids gliich wiiterrede

eifach e chli lühter

si ruefid dänn eifach

was meinsch dezue

ghöri mer si dänn rüefe

was meinsch dezu

oder welle Sänf meinsch

i wellere Schublahde meinsch

i de undere oder de obere

und wohih selli

de Schtuel schtelle

wohih wotsch dasi

de Schtuehl schtelle

uf de Teppich oder näbet de Teppisch

isch d Milch im Chüelschrank

häsch de Zäddel gseh

welle Zädel

de Zäddel am Aaschlahgbrätt

nei de Zäddel uf de Ziihtige

uf de Ziitige deht gsehni känn Zäddel

dänn liihter halt

under de Ziitige

ich bi sicher daser

bi de Ziitige isch

vilicht bim Radioprogramm

oder ufem Radio oder uf de Kafimaschine

oder vilicht häschen

bim Schtaubsuuhge inegsuuget

er isch nur chlih gsih

er chennti guet bimm Schtaubsuuge

inegsuuget worde sih

wäner inegsuuget worde isch

dänn isches nid so schlimm

i channs scho reckonschtruiere

es isches neus Rezäppt gsih

für es Broggoligrattän

ischs Gmües na guet lueg nah

öbs Gmües na guet isch

öbs na langet für es Grattän

hämmer nid gseit mer wellid hütt

es Grattän mache

oder wettsch lieber nüht warms

wettsch lieber nur en Salaht

 

er fühli sich unwohl
hätter grüeft
mer begegni imm
nid vertrouensvoll
mer reschpektieri
sis körperlich erschiinigsbild niid
er suechi iezz
s awärness tiim
er weli iezz mitt dene rede

mini Eltere
choched gärn
am Sunntig fange si
am Zäni a choche
für am Abig

 

 aber werumm mueses bi alldemm auna Entbeerer gäh
 wo entbeered

und werumm mueses bi alldem auna Dulder gäh
wo dulded

dahs segi imm es Rähzel woner gärn glöhsst gseh hetti

wisoh bruhchz de Entbeerer und wisoh bruchz de Dulder

und werum buztz de Entbeerer nihd

und buztz de Dulder nihd

wiso haltezes uhs  

 und i demm Pawilohn

i dere Hütte im Park

durdäh ähr jede Tahg

gloffe-n-isch ufem Wähg

zur Schuel i demm Hühsli

isch ade Wand en Sazz

gschtande härekrizzlet

vill hebezen gläse

däh Sazz und ähr segi

warrschindli de einzig gsih

wonen nid verschtande hebi

di andere hebid immer ali

gruhsig glachet und

kei Angscht ghah

ähr aber hebi immer

Angscht überchoh 

 äsischwansinnig
wediäheissäd
luegämahl
diäheissäd mher

mher

zummvoornamä mher
äm hah eeh ärr
ischdahsnidabnormahl
wettischduh mher heissä
unddiandärä voornämä
sindnidbesser
underscht dgschlächtsnämä
vodä gschlächtsnämä
wämmergarnidredä
aberluegdochemahl
siheissäd
Echakhch
odder
Khachatryan
äsischwenänhuäschtänahfall
wännwenigstänseini
Fridaheissäwür     

 

 Was gsehter deht
Idenä Galäriäh
Er gseht deht nüüht    

öb dahs guet seg

wämmer soh seg

oder öbmer nid au

anderscht chönn sih

soh wenähr soh

dasmer nid chönn

rede devoh

oder nid schöhn

chönn rede soh

dasmer meini

mer chöni nid

schöhn rede devoh

 

ällä ällä
diworsseh
ällä ällä
diworsseh

 

er hebi gwüssi Schwirigkeite

aber dahs segi käss schlächz Zeiche

en grohsse Dichter mösi i Schwirigkeite choh

je grösser er segi deschto grösser wärdid d Schwirigkeite

Ohmacht

tottahli Ohmacht

Immilitähr

Kompanihziht

Nussgipfel

Abbmarsch

Fasse

Zruggfasse

Schanzchnöche go fasse

imm Lauffschritt

Schanzchnöche go zruggfasse

appkomandiert itt Fassmannschafft

Suhberkeit

Nachtüebig

Obschtgarte

Schühssschtand

Angscht das dahs ales verschwindt

Angscht das das Verschwinde nüht Bessers bringt   

 

 d Frau Getrabacho
we alt isch si ächt iezz 
isch si ächt scho gschtorbe  

aber gahts dänn

würkkli bergapp,

isches nid schtabihl

sitt füffzg Jahr

isches doch schtabihl

wiso settis nid iezz

namahl füffzg Jahr

schtabihl sih

 

ob das ales nid
eifach nur en Inszenierig isch
vo de amerikanische Gheimdienschte
oder en Schpass vo Usserirdische

 

s Läbe segi nuhr
ei verdammti Sach
nach de andere

 

es weli imm
eifach nid in Chopf
er chönis nid verschtah
es segi ales so truurig
ales so tumm

 

es gitt nüht

wos nid gitt

nüht Böhses gebis i siner Erinnerig

aber ön dahs unbedingt es guez Zeiche segi

öbs nid glihch dah gsih segi s Böhse

eifach echli veschteckt für inn nid sichtbahr

aber für de Vatter sichtbar fürt Mueter sichtbar

si hebiz imm vilicht nid zeigt si hebiz zrugggschühcht

mit vill Kunscht und überwindig überwindig

segi übrigens es Wohrt gsih woner vill ghört hebi

es choschti si vill überwindig hätter mängmahl ghört

vo siner Mueter aber nid so rächt veschtande

wases isch wosi sovill überwindig choscht

 

 

 

öber ächt e Chindheit ghah hebi

er erinneri sihch a einiges

aber nid a vill schöhn segis

daser fascht nüht Schlächz

ide Erinnerig hebi nüht Böhses

au nüht Truhrix nur emahl

hebi de Vatter vezellt das eine

eme andere esone Ohrfihge ggäh hebi

daser ganz e rohti Bagge ghah heg

ufem Bou segi dahs gsih sin Vatter

hebi ufem Bou gschaffet

als Bouschrihner das segi i sihne Auge

immer vill gsih er hebi sin Vatter

bewunderet für diä Türe woner ihgsezzt hebi

für diä Chuchene und diä Feischter

aber für anderi segi dahs sicher

nid vill gsih aber si hebiz nid gseit

und soh hebers au nid gmärkt

 

 

es hebi imm

immer öppis gfählt

aber er hebis nid gmärkt

oder nid wele märke

es gebi jana vill Lüht

dene göngis glihch

es fähli ine vill

aber si märkiz nihd

es göngi eigettli allne soh

und jeweniger mers märki

deschto besser segis

ähr märkis mängmahl

doch rächt dühtli

es segi unnglaublich

und unnheimlich

wasimales fähli

tänker dänn

es fähli imm ales

er hebi nüht