isch ächt diä scho gschtorbe
wo so luut gsi isch
luuter als de hardrock
wosi laufelah hätt
isch ächt d Frau no-es-possible
schon gschtorbe
odder d Frau no-para-mi
odder d Frau biänsür
erinneret sich vilicht na eini a mich   

 

er hätt gmeint
surrealistiggpillou
segi a rockbänd
woner nid käni

 

 

somm nuh fu

wui nuh somm fu

tottallman

aber ähr nihd

ähr segi na normahl

ähr segi de einnzig

wonanormahl segi

ähr hallti drah fescht

harttnäckig

 

allerings

rede chöni mer mit niämärtem

abers rede segi ja au nid so wichtig

s Rede überlösi mer andere Nazziohne

dahs überlösimer de Tühtsche und de

Franzohse und de Ittaliener

dah gsechimer wohi s Rede füeri

inere guet funkkzionierende Wält

segi s Rede gahr nid nöhtig

s Schwige segis einzig Richtige

und sägi meischtens villmeh

gwüssi Sache chönimer ja gahr nid säge

dah fählid doch d Wohrt

und grad i dere Beziehig

segizi vilicht ganz psunders wiht

ähr wüssi vo nühtem

wases segi

aber ähr tögi soh

we wäners wüssti

unttahs langi

kohmischerwihs

chömimer soh

ganz guet

durs Läbe

er woni imene Land

wo di Frömmde niä oni en fromme Schuhder beträttid

wänns mittem Fluggzühg chömid dänn meiniz de Flughafe Chlohte

segi grad vorere Schtund i Betriib gnoh worde so suhber ischer

und so nöi und si chönz nid glaube wämer ine seit de Flughafe

segi scho zäh Jahr alt bi ine isch öppis

wo e meh als e paar Monett altt isch kabutt

und währ mittem Auto chunnt däh hätt Härzchlopfe am Zoll

i jedem Fall wirter misstrouisch ahglueget öber iezz imene

rassige Schportwage chunnt und guet ahgleit isch oder nihd

er wirt kritisch ahglueget und er fühlt sich au ganz chlih

und unnzuelänglich er gseht daser da woner härewott nid härepasst

er probiärz wenigschtens er überleizich öber ali Uhswiise hätt

öber de Impfuhswiis für de Hund hätt und ali Versicherixuhswiise

und er scheniärzich wiler grahset isch uf de Autobahn und

d Chüelerhuube vo sim Merzehdes glüeigheiss isch und au de

Merzehdesschtährn isch ja echli schiäf und hinenim Auto

machz Chind grad e Söiornig und verstöit Bröhsme jah

jede wo chunnt wirt vo Zwihfel beschliche zurächt wener glaubi

währ isch hütt nid e zwihfelhafti Erschihnig öber iezz arm isch

oder rihch er isch es zwihfelhafti Erschihnig däh Ihdruck hätt

jedä wo inechunnt ähr segi e bizzeli schtolz uf dahs Land

uf diä Sonnderexischtänz är verstöchi diä Mittbürger nihd

wo sich bi all demm nid wohl fühled oder soh tögid we wännsisich

nid wohlfühle würdid dahs segi i de meischte Fäll nid ärntscht

gmeinnt ali diä Kritikker segid ja di gröhschte Gnühsser und

gröhschte Wihtrinker und glaubid ganz fescht a iri Uhserwählig

soh segi sihs Land es gähpti na vill zsäge er chönnti

es ticks Buech schriibe drüber aber er höri iezz uhf