für mich isches nanig färtig
für mich gahts na wiiter
mach fürschi

er göngi nur sälte is Kino und luegi na vill sältener

en Film zweimahl ah aber emahl heber en Film zweimahl

ahglueget wäge de truhrige schtille Musik wo i demm Film

vohrchoh isch und wägeme Schüeler wo i demm Film zu dere

truhrige Musik hin und härgrännt isch über änglische Rase

und dur änglischi Pärk vom Schloss zum Schtall und vom

Schtall zum Schloss und vill Uhfträhg hätt möse erfüle und

nid rächt gwüsst hätt werum mer imm ali diä Uhfträhg gitt

und wäge de Szehne am ändi vomm Film wo zwei altti Lüht

imene Auto sitzed und im schtröhmende Räge nöimethih fahred

en Mah und e Frau und de Mah de Frau öppis vezellt ohni si

ahzluege ganz ruhig retter und lueget uft Rägetropfe a de

Schiibe er hebi si sis ganz Läbe lang gliäbt seit de Mah

aber hebi ire dahs niä chöne säge und niä tärfe säge nur iezz

soh schpaht wos kei Bedühtig me chöni hah dah sägers und er

segi froh dasers chöni säge er hebi s ganz Läbe lang ghofft

dases emahl en Momännt gebi woners chöni säge seiter untt

Frau sitzt schtill dah fascht we Königihn vo ängland und

mer weiss nid wassi tänkt und öb si grüert isch oder nihd

s ganze Gsetz vom mänschliche Dahsih

beschtöchi nur darin dass de Mänsch sich

immer vor öppis unermässlich Höhchem und

unermässlich Schöhnem büge chöni daser sich

immer vor öppis Unändlichem niderwärfe chöni

und rüefe chöni Gnahd Gnahd Vebahrme Vebahrme

Wämenim das unermässlich Höche und Schöhne wägnemi dänn

wärdi är nid am Läbe bliibe sondern verzwiifle und schtärbe

es gebi Ameiseschtahte

wo Pilze züchtid bis iezz segid

rund zweituhsigachthundert Ahrte bekannt

si trihbid mit denä Pilze sogahr Handel

und tuhschid si uhs mit andere Ameiseschtahte

es gebi Handel au zwüschet ganz verschidene Ahrte

und si segid au ide Lahg nöii Sortte z züchte

si chönid sihch innert chürzischter Ziit

a nöii Verhelltnis ahpasse  

 

ischderdahsklahr

neisischmernidklahr  

wisoh

isches soh

es isch esoh

wills esoh sih mues

es währ nid esoh

wänns nid esoh mössti sih

es chönnti aber au ganz anderscht sih

aber mer mönd froh sih dases nid anderscht isch

es chennti nämmli na vill schlächter sih

besser chenntis doch chuhm sih

es segi doch e oberi Gränze

erreicht es gebi settigi

oberi Gränze a villne

Ohrte im Schportt

zum Bihschpihl

au bi Gfühl

oder bim

Geischt

bim Geischt

gsechimers ja ganz

tühtli deht segi e oberi Gränze

erreicht scho sitt öppe zweihundert Jahr

oder villicht scho sitt zweituhsig Jahr oder

drühtuusig Jahr sitt de Grieche und de alte Jude segi

e oberi Gränze erreicht iezz göngis

scho lang wider bergapp häsch

ghöhrt dahs isch doch klahr

mer gsehz vo wiihtem  

mer mösi uhfpasse

wäneim öpper gschihd schiini

wämer de Ihdruck hebi

das öpper ganz en schöhne

wunderbahre übernattürliche Veschtand hebi

dahs segi nur e Illusiohn

wo uf irgendwelchi Suppschtanzze zrugggfüert chöni wärde

Suppschtanzze wo bi Verliäbtheit uhsgschüttet wärdid

vilicht segis ja au gahr kei Illusiohn vilicht

segis ja würklich soh vilicht gsechimer vill meh

und vill tühfer wämer verliäbt segi

diä Suppschtanze sorgid defür dass sich zwei Mänsche

fürenand interessiärid und s Ganze segi umso uhfregender

je verschidener diä Mänsche segid

dänn segis wenes Wunnder

dasmer plözzli sovill gseht

au das wo i de tühfschte Tühfene vo de Seel verborge-n-isch

dänn segis wenes Wunnder

dasmer so vill rede chöni und sovill frähge und dühte

und sovill erchäne mer hebi s Gfühl mer erchäni ales

wos gebi uf de ganze Wältt aber es segi öppis wo vorübergöngi

plözzli frähgi mer dänn nüht me und gsechi nüht me

und verstöchi nüht me d Nattuhr welis soh hah

gliichgültig mösimer dänn wider sih wenes Krokodill

unttumm wenes Kamehl so welis s Läbe

soh segid gwönndli immer ali  

Es wäri an sich schön
wännsi echli weniger würdid schpinä
aber dänn wärisimm
vilicht aunid rächt

 

er fröii sich immer
wänn widder öppis Schlimms passiäri
wänn widder öppis Schlimms passiäri
würder widder
zum Dichter

 

Er läsi iezz Tanabasis
er glaubi er segi sällber
uff sonere Anabasis
uffeme schwirige Rückzuhg
nacheme lange Fäldzuhg
ines grosses findlichs Riich
woner grossi Schlachte verlohre hebi
möser sihch iezzt zruggziäh
über Gebirgspäss
unzzich verteidige
gäge wildi Bärgvölker
öberächt sis Trapezunnt
na erreichi