wosi z Rapperswil verbihgfahre sind
ischem öppis in sinn choh
wovor über sächzg Jahr passiert isch
ufere Schuelreis
wosi am Änd na imene Reschtorant tanzet händ
en Bueb vo siner Klass isch usegrännt
und hätt gseit er machi Sälbschtmord
will d Kätti nid hätt wele mittem tanze
au är hetti gärn mitte Kätti tanzet
hätt aber garnid gwagt si zfräge
si isch mit Abschtand die Schönscht gsih
für inn unerreichbar
das hätter gwüsst
das isch so klar gsih
daser sich garnid umsi bemüeht hätt
aber vomene Sälbschtmord ischer dänn doch
wiht entfernt gsih
er hätt sich an anderi ghalte
wo vill weniger schön gsi sind
zimmli luschtlos hätter mit dene tanzet
stiif ungschickt
wenen Holzbock

öppsis ächt würdi uhshalte
imene Luxushotel
odder öppsis lieber einfacher hetti
nizzo wahnsinnig frünttlich
nizzo warmherzig
oni sovill Dienschtleischtige
öppsis verruckt findi
für es Nachtässe
zweihundertfünfzg Franke z zale
öppsi schomal es Schatohbrian ghah hebi
er würdi ire sofort es
Schatohbrian bschtellesä
wännsi eis wetti

öppsi auch auscho
imene Luxushottel gsih segi
öppsi ächt en Ahnig hebi
we dahs deht segi