öb das iezz

guet segi

dahs wüsser nihd

es gebi niämärt

wo imm chöni säge

öpps guet segi

es segi warrschinnli

ungghühr guet

als Mänscheforscher

hebi inn s Militähr

immer innteressiärt

hochinnteressant segi zum Bihschpihl d Frahg

werum mers bi allne Verbesserige und Reforme

vo de letschte Jahrzäht nid erreicht hätt

d Dummheit und de Läärlauf unz ewige Gschimpf

und Gfluech usem Militährbetrihb z eliminiärä

es mösi dah Konschtannte gäh

es gebi uf de Wält Abläuf diä

garnid chönid reformiärt wärde

i dene sich nohtwändigerwiihs

immer di gliiche Zueschtännd

tögid zeige mer chönis nid mache

ohni gwüssi Schtimmige z erzühge

und mer mösi mit dene Schtimmige

läbe si segid ja sogahr nüzzlich

mer chöni doch viles lehre es gebi

niänet suscht sone Glägeheit dezue

mer chöni sich in Rue und ohni ärnschthafti Folge

uf anders vohrbereite wo na chönnti uf eim zuecho

är zum Bischpihl

hebi im Militähr

enorm profitiärt

mer bringi inn iezz

fascht nüme uss de Rueh

was au immer passiäri

für inn hebid also

di positihve Aschpäkt

immer überwoge au wänn das

anderi gahr nid gärn ghörid

ganz schlimm isch ja au
s Appezällerland
solangs ebä im Dings ine sind
bringsches nüme wägg

 

mer gsechi erscht spähter

was würkkli lohs segi

wämer mittene z tue hebi

märkimers nihd dänn segmer

beihdruckt vo irne Aktivitähte

dänn wärdi gschaffet

dänn seged ali immer im Schtress

immer a Beschprächige oder

uf de Fahrt zu Beschprächige

oder am telefoniärä oder faxe

aber schpähter gsechimer

das ales nurr Theahter gsi segi

mer hebi nur mit gschickte

Schauschpiler z tue ghah

si hebid eim öppis vohrmacht

si hebid di Tüchtige gschpillt

di Kompetänte di Uhfmerksame

si hebid soh tah we wännsi

Ihfluss hettid we wännsi

öppis chönntid erreiche

mitt demm vile Gält wo si hebid

mer gsechi erscht schpähter

we schlampig si segid we fuul

we innkompetännt mer schtuhni

immerhin we guet si dahs chönid

schpile si hebid offesichtlich

en Begriff vo demm wo si settid sih

irgendimene Egge vo de Wält

hänzzi Vohrbilder gseh

und richtid sihch nach ine

är wärdi

es Füür mache

är wärdi Holz sammle

und vill Holz zsämeträhge

är wärdi sihch

nid schohne debih

und en Riisehuhfe mache

und är wärdi

ali fessle und zämebinde

und uff de Holzschtohs legge

ali mittenand und ufenand

är höri nid uhf debih

är wärdi dahs mache

und er wärdis nid beröie

er wärdi s Holz ahzünde

und wärdi zueluege

är segis wo redi

är de Härr

und er debih sih und zueluege

wenali verbränid

und er wärdi wahrte bis nurrna

es Hühfeli äsche dah segi

voll chliine Chnocheschtückli

und är wärdi das Hühfeli näh

unz mit sich umefüere

unz über di ganz Wält verschtröie

dahs wärdi är mache

är hebi sichs vohrgnoh

und es chöni inn niämärtme

devoh appringe

so wärdimer gseh

wär de Härr segi

si segid nothwändigerwiis dah

soh wes ufeme Chueflade es rihchs Läbe gebi

mit Flühge und Chäfer und vielem Getier

soh gebis uff demm rihsige Wältlihchnahm

ebä au Organisme wo sich vollsuuged und

sich volllaufe lösid und debih überzühgt segid

dassi es guez Wärk tögid und e gueti Litterathur

produzziärid oder suscht irgende höchscht wichtigi

und höchscht nüzzlichi Arbet leischtid

mer tärfi sihch nid lah schtöhre vo all dene Erschihnige

mer mösi schtill sin Wähg gah

oder schtill i sinere Hütte sizze

und sihch sälber sih und nid

uff dahs lose wo umeimume

verchündet wirt und grüeft

wänns en Gott gäpti
so chönntis nur eine sih
wo grossi Würde hätt
ganz e höchi Würde
wo nur diä erlöse wür
wo latinisch singe würdid
oder a irer Bärdigung
s Rekwiem würdid singe la
mittem absolve Domine
undemm in Paradisum

 

si isch immer in Effrätike ihgschtige
und nachär es Jaar im Sudahn gsih
und dänn au na in Nöiseeland
und wosi zrugg cho isch
nach sibe Jaar
isches eifach so wiitergange
we vorhär

es Loch
es Loch is Ihs schlah
er hätt grad Angscht überchoh
wosi dahs gseit heit
es gitt Ihs
das isch klar
und mer chan au
es Loch is Ihs schlah
wämmer Muet hätt
es mues ja nid grad Sälbschtmord sih
er hätt diä Aschpilig verschtande
hätt aber nüht gseit
hätt vilicht tänkt
dases für inn besser isch
wänen andere das Loch schlaht
und en andere ineschpringt

es würen wunder näh
wassi über inn würdid säge
wännsi inn käne würdid
sitt villne Jahr als Nachber
oder als Koleg im Chegelklupp
dänn chönntiz sicher vill säge
und vill lache

nurrna dekadänt
nurrna peinlich
nurrna beklämmend
nurrna grässlich

 

us
alem
vill    

es segi ales

en Kreislauf

en Kreislauf

vo Böhsem wo

de einte amm

andere ähtög

en Kreislauf

vo Schuld wo

wo niämärtme

chöni wägnäh

es göngi soh

wihter bissi

ali enand uhfgfrässe hebid   

 

wämer

ales Böhsi

wetti uhflihschte

wo de Mänsch machi dänn

chömimer a käsänd er weli garniddruf ihgah

immlangi s Böhse woner a de Tiär ahtögi a de sannfte Tiär

a de zuetrouliche und ahhängliche und wehrlohse Tiär

a de Huhstiär woner sälber inen Zueschtand inezüchtet hebi

wosisich nüme chönid wehre Chüe zum Bihschpihl chönid sich

doch nid wehre sondern mösid ires Läbe läbe genausoh

wet Söi oder d Hüener wast Hüener erläbid

segi unnghühr segi gschpängschtisch

segi nüht anders alses Konzentrazziohnslahger

mer mössti de Mänsch elei wägedene Hüenerschtäll

wägnäh vo dere ärde wäge dere Chäfighalltig

 

 

 

mane segid au
sehr verlezzlich
mane chönid au
schlimmi Sache erläbe

 

er isch so sehr zfride gsih
daser kei Zahweh me gha hätt
er isch aber überhaupt zfride gsih
obwoll er wenig Grund gha hätt derzue
de einzig Grund woner vilicht hetti chöne ha
isch gsi
daser na gläppt hätt
und dises und jenes hätt chöne mache
wärettemm anderi
schon längscht gschtorbe gsi sind

 

woner
a irem Huus
verbih cho nisch
hätter sich bekrüziget
aber nid
um sich z schütze
vor tüflische Ihflüss

 

mängmal
wäner öppis läsi
wärdis imm
fascht schlächt

mängmal

i sältene Fäll

segis aber au

wenä Erlüchtig

mängmal chöner es Buech

nur mit Beklämmig

it Hand näh

so guet segis

so höch

so überirdisch

zum Bischpihl

Griechischi Kulturgschicht

vom Burckart

oder au öppis vom Dömästrr

oder em Schmitt