das ales
segi
wansinnig interessant

als Mänscheforscher

hebi inn s Militähr

immer innteressiärt

hochinnteressant segi zum Bihschpihl d Frahg

werum mers bi allne Verbesserige und Reforme

vo de letschte Jahrzäht nid erreicht hätt

d Dummheit und de Läärlauf unz ewige Gschimpf

und Gfluech usem Militährbetrihb z eliminiärä

es mösi dah Konschtannte gäh

es gebi uf de Wält Abläuf diä

garnid chönid reformiärt wärde

i dene sich nohtwändigerwiihs

immer di gliiche Zueschtännd

tögid zeige mer chönis nid mache

ohni gwüssi Schtimmige z erzühge

und mer mösi mit dene Schtimmige

läbe si segid ja sogahr nüzzlich

mer chöni doch viles lehre es gebi

niänet suscht sone Glägeheit dezue

mer chöni sich in Rue und ohni ärnschthafti Folge

uf anders vohrbereite wo na chönnti uf eim zuecho

är zum Bischpihl

hebi im Militähr

enorm profitiärt

mer bringi inn iezz

fascht nüme uss de Rueh

was au immer passiäri

für inn hebid also

di positihve Aschpäkt

immer überwoge au wänn das

anderi gahr nid gärn ghörid

 

 

mer gsechi erscht spähter

was würkkli lohs segi

wämer mittene z tue hebi

märkimers nihd dänn segmer

beihdruckt vo irne Aktivitähte

dänn wärdi gschaffet

dänn seged ali immer im Schtress

immer a Beschprächige oder

uf de Fahrt zu Beschprächige

oder am telefoniärä oder faxe

aber schpähter gsechimer

das ales nurr Theahter gsi segi

mer hebi nur mit gschickte

Schauschpiler z tue ghah

si hebid eim öppis vohrmacht

si hebid di Tüchtige gschpillt

di Kompetänte di Uhfmerksame

si hebid soh tah we wännsi

Ihfluss hettid we wännsi

öppis chönntid erreiche

mitt demm vile Gält wo si hebid

mer gsechi erscht schpähter

we schlampig si segid we fuul

we innkompetännt mer schtuhni

immerhin we guet si dahs chönid

schpile si hebid offesichtlich

en Begriff vo demm wo si settid sih

irgendimene Egge vo de Wält

hänzzi Vohrbilder gseh

und richtid sihch nach ine

är wärdi

es Füür mache

är wärdi Holz sammle

und vill Holz zsämeträhge

är wärdi sihch

nid schohne debih

und en Riisehuhfe mache

und är wärdi

ali fessle und zämebinde

und uff de Holzschtohs legge

ali mittenand und ufenand

är höri nid uhf debih

är wärdi dahs mache

und er wärdis nid beröie

er wärdi s Holz ahzünde

und wärdi zueluege

är segis wo redi

är de Härr

und er debih sih und zueluege

wenali verbränid

und er wärdi wahrte bis nurrna

es Hühfeli äsche dah segi

voll chliine Chnocheschtückli

und är wärdi das Hühfeli näh

unz mit sich umefüere

unz über di ganz Wält verschtröie

dahs wärdi är mache

är hebi sichs vohrgnoh

und es chöni inn niämärtme

devoh appringe

so wärdimer gseh

wär de Härr segi 

 

si segid nothwändigerwiis dah

soh wes ufeme Chueflade es rihchs Läbe gebi

mit Flühge und Chäfer und vielem Getier

soh gebis uff demm rihsige Wältlihchnahm

ebä au Organisme wo sich vollsuuged und

sich volllaufe lösid und debih überzühgt segid

dassi es guez Wärk tögid und e gueti Litterathur

produzziärid oder suscht irgende höchscht wichtigi

und höchscht nüzzlichi Arbet leischtid

mer tärfi sihch nid lah schtöhre vo all dene Erschihnige

mer mösi schtill sin Wähg gah

oder schtill i sinere Hütte sizze

und sihch sälber sih und nid

uff dahs lose wo umeimume

verchündet wirt und grüeft

si segi nizzo schüch
wenär meini
si chöni sehr druffgängerisch si
ganz hämmigslos
wännsi weli
er mösi echli ufpasse
wäner mitt ire weli ztue ha
si machi eim
de Hoseschlitz uhf
wännsi i Schtimmig chömm

 

d Dekadännz segi en durchuhs nattürliche Zueschtand

we ali andere Zueschtänd segi au d Dekadännz

en nattürliche Zueschtand d Natuhr weli zu gwüsse Ziite

d Dekadännz si weli nüme vill i Sache inweschtiäre

wo kei Zuekunft hebid wännsi gseht dahs nüht me zmache-n-isch

dänn willsi dass dahs vo entschtande-n-isch au wider verschwintt

dänn willsi dases bergapp gaht und daderführ häzzi iri Prozeduhre

wo deführ sorged dass s ändi rascher erreicht wird energihschparend

und das erschtna ali luschtig sind debih und uf iri Ahrt produktif

 

er segi än Seher
er segi en Vates
er stöchi im Schturm
ufeme höche Felse
mitte Lira die Händ
und singi

Lühtere doch ah
gang doch zuenere

fräg si doch

muesch nur ahlüte

muesch nu fräge

si chiem sicher

si chiem

häsch Angscht

si chiem vilicht sogar gärn

si wartet vilicht druff

dasd ahlütisch

und frägsch

wag doch öppis

s cha sicher nüt passiära

 

 

si heissi Hannah
Hannah mitteme hah am Schluss
und segi sehr e schwirigi
und segi blödsinig gschihd
es segi furchpar
aber si passi guet
zu all dene Hirnwichser
i irer Umgebig

öber hoffe tärfi

es gebi settigi

diä hoffid eifach

das segid di Tumme

und es gebi anderi

diä segid besser drah

diä tärfid hoffe

denä segis erlaupt worde

z hoffe er wetti

dasimmdahs au erlaupt würdi

öber hoffe tärfi

es laufi doch ales

uf dahs use

hoffe dasmer

tärfi hoffe

hoffe dasmer

tärfi hoffe

dasmer chöni

 

es segi nid

wes setti sih

es segi irgendwiä

missglückt

es segi irgendwiä

verchehrt

aber mer chönis

dräje und wände

wemerswell

es gebi känn Sinn

 

d Bible segi öppis Hochinteressanz

si segi voll vo de wunderbahrschte Gschichte

voll vo Ahleitige und Bihschpihl

mer chönnti meine dases mössti vorwärz gah

wäne Poppulaziohn über sones Buech verfüegt

mer chönnti meine dases Mänschetiär

wo sones Buech hebi chöne hervohrbringe

doch irgendwiä mössti e Zuekunft hah