gasch elei

fascht elei

was sölerna mache

er wüssi nüme

waser na mache chönnti

es gebi nüht me zmache

es segi ja ales schon gmacht

unttzwar sitt zweituhsig Jahr

vilicht sötter sich ganz

uft Briefmarke konzentriere

oder sötter ächt na öppis dichte

sih segi

das Sägelschiff

wo wiitusse imm Meer

verbiiziät we vomene Zauber gleitet

gschpängschtisch schöhn

und unberüärt vomm schaurige Schturm

und vomm allgemeine Durenand

Felse zittered und tüüf i de ärde

schtöhnet und brüelet de ärderschütterer

abers Schiff schwäppt verbih

di grosse wihsse Sägel im Wind

es schiint als hetti sich ali Rue

und ali Schwiigsamkeit vo de Wält ihgschifft

und wür übers dunkle uhfgwüelte Meer wäggschwäbe

wenen unnghühre Summervogel jah das isches

mis Glück sitzt deht mis bessere Sälbscht

jah das wärs übers Dahsih hihschwäbe

das wärs jah

so fangi de Afforismus Numere sächzg

vo de Fröhliche Wüsseschaft ah

er zitieri inn iezz nüme wiiter

will de zweitte Teil für sih nüme gällti

de zweite Teil hebi ales uhf und chehri ales umm

wasim erschte Teil gseit wärdi   

es hebi e Dimension erreicht

wosis nüme uhshalti

irgendwo fähli ire einfach s Mass

di zwei Chind redid nüme mit ire

wär er ächt tänkter mängmal

wäner als Frau uf t Wält choh wär

schön gnueg gsih

um i dene Chreise verchehre z chöne

schön gnueg

das si inn uhfgnoh hettid

und gmalet und fotografiert

und Gedicht uber inn gmacht

wär isch ächt

t Anastasiabizzos gsih

läppt si ächt na

läppt ächt au t Mara na

woner si zum erschte mal

ahtroffe hätt

im Vorzimmer

häzzi inn lang ahgluegt

lang und vertröimt

und gseit I bi t Mara

ganz langsam

we wänn das öppis ganz unngwönlichs wär

odder we wänn si wür annäh

das er scho ales über si weiss

und weiss mit wemm si

scho ales gschlafe hätt

mer wänd nid

zu denä ghöre

mer wänd nüht

mit denä

ztue ha 

öbächt

de tabakoff

na läbt

öbächt

de tabakoff

na immer

so schön singt

weisches du

läppt de tabakoff na

Wämmer

Wämmer öis

Zsämetue

mängmahl tänki är es gebi gahr nüht z säge

und jede wo öppis sägi segi en Idiott

und är segi nattührli au en Idiott wänner tichti

tichte heissi immer en Seich zämeztichte

es segi niä öppis anders wämers iezz nid märki

dänn märkimers i drei Jahr oder i fünfzzg Jahr

und schämi sich dänn dasmers nid gmärckt hebi

und dasali Jahrzähtelang ein Seich gläse hebid

mängmahl tänki är dases nur eis gebi degäge

nämmli schtile z sih und sihch nüme z mälde

aber au dah gebi eim d Natuhr de Rahme es gebi settig

wo sihch mösid mälde kohmischi Vögel wos dänn hühfig

gahr nid guet göngi s Volk reagieri ja zimmli nervöhs

wänn eine chömi und ine weli predige aber es gebi au

anderi es gebi settig dereniri Beschtimmig segis

schtile z sih dahs gebi dänn mangmahl e zauberhafti

Würkig und mer tänki diä Schtille segid di Gschihde

und diä Schtille segid di wunderbahrschte Männsche

aber soh sicher segi dahs nihd di Schtille chönid eim

au enttühsche und segid womögli au ummöglichi Siäche

aber dahs segi ja hühfig nid sofort z erchäne und soh

chönimer immer gwüssi Hoffnige ha wämersi gsechi

das wärdi ales wägg gäh

das wärdi ales furtgrüert

das wärdi ales vermoschtet   

AKTIFISCHTE

Bärner Peizehocker

Bärner Peizeschwäzzer

Langwiiligi Lüht

Peizetuble

Chliikariert

MUFFIG

VERSCHLAFE

Peizeschnorrer

Unnbruchbar

Immer am umeluege

Öb eine chömm

Mittere schöne Frau

Si sälber händ niä eini ghah

di Schöne sind ene immer usem Wähg gange

NONNKONNFORMMISCHTE

sind ene doch echli verdächtig gsih

au wännsi ali uns guete Verheltnis cho sind

für di Schöne sinzi nid i Frag choh

Di Schöne händ nid

ires Läbe lang wele Riocha trinke

Und nachär grusigs Chopfweh ha

und so sind Peizehocker druf ahgwise gshi

das en andere mit ere Schöne cho isch

wo iri Erwartige erfüllt hät 

Grundsätzlich tärf mer niä

Verschtändnis ha

Grundsätzlich

Tärf mer sich söttigs nid bühte lah

Mer mues si behandle we Hünd

Das isch s Beschti

Susch chunnt s nid guet use

setterächt

oder setterächt nihd

jah er setti

er settis scho lang

er wetti

er wettis

Wihsheit segi nid umbedingt

öppis Erschtrebenswärz

Wihsheit segi Egoismus

höchschten Grahdes

Wihsheit bedühti dasmer sich

appschlüssi und verappschidi

und weli oni Schmärz sih

oni Lihde aber dahs göngi nihd

mer mösi lihde und lihde sueche

und Wihsheit chönnti alefalls

darin beschtah das Lihde

immer genau z berächne   

Verruckti Zueschtänd

Schrecklichi Zueschtänd

Abschöilich

Mängmal gsecher na e Frau

wo inn interessiäri

vornehmi Erschinige

grossi uhfrächti stolzi Fraue

woner sich chönnti vohrstelle

mitt ine z läbe

gschiidi und sehr vernünfftigi

si mösstid inn aber in Rue lah

wäner wetti in Rue glah wärde

und das weler ja meischtens

das weler ja immer

aber eigentlich wetter ja öpper finde

woner nid wetti

dass si in inn Rue lössti

eini wo immer zu imm chiemti

und immer öppis Schöns säge würdi

immer öppis sehr Gschiids

immer öppis Nöis

immer öppis Guets

si müesstid doch

nattürli müesstiz

er hebi de Dialäckt gärn

s Schwiizertütsche segi e Schprahch

womer sihch sehr chrefftig chöni uhstrucke

es segi we wän ales fett truckt währ

es gebi nüht unbetohnz oder fascht nüht

und soh hebimer de Ihdruck das ales womer sägi

besser itt Chöpf ine dringi ali Fokahle segid lang

ali Konnsonnante würdid voll betohnt vilicht

segi däh glücklichi Dialäckt am Uhfschtihg

vo de Schwiiz mitbeteiligt imm Mittelalter

segis übrigens na vill farbiger gsih na vill

tühtlicher deht hebimer zum Bihschpihl nid

brünzle gseit sondern pruntzen deht hebimer

pette gseit anschtatt Bett und swartz anschtatt schwarz

und susser smack anschtatt süesse Gruch