si leged Eier

und schlüpfed uhs

si schwired und schwärmed

si tanzed und gumped

und händ Panzer und Helm

und wärded nid müed

und händ Schtachle

und immer es wiitoffnigs Muul

und es Mässer schteckt im Gürtel

öpps öppis nüzzt

wämer dah drihtrommpehtet

mit lange chrumme Posuhne

wämer dah versuecht

e paar gschtabigi ängle

uhszschicke mittem Uhftrahg

das Gesindel echli zruggzdränge

är

segi nur e Randfiguhr

aber mer tühschi sich

wämer ärä Randfiguhr

keis Läbe zueschrihbi

wämer meini e Randfiguhr

segi weniger Mänsch

als e Haupptfiguhr

es segi ebä grad nid eso

inere Randfiguhr segi

mängmahl villmeh Läbe

als inere Haupptfiguhr

di meischte Haupptfiguhre

segid völlig bedühtigslohs

obe chöni sihch niämärt

de solide Tummheit entzieh

wo i denä Regiohne nöhtig segi

würklichs Läbe chönis

nur i de Underdrückig gäh

deht tögs sich entwickle

dahs wüssi si doch

dahs heber ja vo ire

diä Ihsicht

es chömi nid hühffig vohr

nuhr

ali

zwei

Jahr

är wäri liäber Musikker

vill liäber

aber öber dänn zfridener wär

wüsser nihd

Musikker sih segi vilicht

gahr nid so interessant

und mer mösi sihch vilicht

vill ärgere

wämer Musikker segi

mer hebi sicher Schtriht

mitte andere vo de Bänd

oder mitte Fraue oder

de Schurnalischte oder

de Tohntechniker oder

de Lüht vo de Plattefirme

oder au mittem Hottelpersonahl

und vilicht segi s Musikkmache

en Arbet we jedi anderi

vilicht segi dahs erzühge vo Töhn

gahr nid eso mit Luscht verbunde

wemer tänki vilicht segis

öppis sehr ahschträngenz

und au langwiiligs

vilicht segis wenä Arbet

inärä Lampefabrick oder imänä Büro

mer wärdi
wämer nid über diä Frahge nahtänki
niä zunere Löhsig choh
mer wärdi aber au
niä zunere Löhsig choh
wämer über diä Frahge nahtänki
es segi sogahr warrschinndli besser
nid nahztänke wämer gsechi
wiä lächerlich diä segid wo nahtänkid
dänn tänkimer besser nid nah

si fröijid sich
aber iri Fröid haltti sich i Grännze
mer seli jah nid meine
mer hebizi iezz befridiget

irgendöppis schtimmi nihd

suscht gähptis doch dahs ales garnihd

es segi doch ales ganz abnormahl

es wärdi ja ales immer bizzarrer

es erschihnid immer appsurderi Figuhre

aber diä appsurde Errschihnige

cönid sich so errschtuhnlich guet verchauffe

das niämärt so richtig märki was lohs segi

und es segi doch de Tühfel lohs

Er segi dä
Wo nid erlaubi
Dasmer löschi
Wänns bränni 

O Schwähri

Chann en Pfadi Vohrbild sih
Isch en Charte Schtudierende
Krokizeichnende
Lumpeliedli Singende
Morse Chönnende
Vohrbild
En Appghärttete
Eine wo immer i allne Lage
sini guet Luhne nid verlührt
Vohrbild

es gebi kei Lösig me
d Umwält göngi kabutt
ali Bemüeige nüzzid nüht
das segi eigettli allne klahr
es angaschierid sich drumm immer weniger
es werdid ali skeptischer
es wärded ali fatalistisch
es wärded ali sowiit ehrlich

är verzwiifli

a de Sprahch

wäner dahs ghöhri

es wärdi dah

öppis uhstruckt

womer nid mitte Sprahch

chöni uhstrucke

öppis Höchers

soh töhnis vilicht

imm Himel wänn

de Herrgott mit sine ängle

d Gittare it Händ nemm

und s Saxxofohn

en Siig wärdi verchündet

en ewigi Seeligkeit

Chrafft Chrafft

en seelige Zueschtand

wahs chönnti dänn

dah na passiere

es channühtme passiere

es channühtme choh

wär wetti dänn dah na choh

wär dah na chiem

däh würdi ja grad

usegschosse i höchem Boge

däh würdi d Schtäge derapp grüert

däh chähmi sicher niämeh

öb ächt d Zahl

e Role spili

öbmer unbedingt

vili mösi hah

we dä Brächt

oder dä Bärgmann

oder öbs ächt au

mitt einere gaht

oder mitt zweine

er glaubi immer
was de Papscht sägi

Leider
rief er
leider

mer setti
ganz villne
s Schtimmrächt entzieh
mer setti
ganz villne
s Wahlrächt entzieh

am morgenamm sächsi

lauffi immer eine verbiih

hättsi gseit

wo zur Arbet göngi

und däh choderi

so gruusig dassi

jede Morge verwachi

und nüme ihschlafe chöni

er halti e paarmahl ah mängmahl

grad vorem Schlahfzimmerfeischter

und choderi schaurig

er segi sicher chrank

es göngi warrschinnli nüme lang

und dänn chömer nüme verbih

wär soh choderi däh segi

sicher ganz kabutt innwändig

früener hebid si na vill meh gchoderet

mer hebi eifach an Bode gchoderet

mer hebi immer möse uhfpasse dasmer nid

inen Chöderlig inegschandenisch

wänneinä en richtige Choder im Muul gha hebi

heber demm en Grüene gseit und segi

fascht na schtolz gsih druff

es hebid ali immer e Schnudernase ghah

oder öppis imm Hals

si händ nur es bitzeli möse hüeschtle

dänn händ si scho en Choder peraht ghah

und händen dänn so wiit we mögli gschpöizt

mängmahl a eine ane an en Chliine

usere undere Klass oder suscht eim

ad Jagge oder is Gsicht sodas ali

umegrännt sind unz verzellt händ

lueg deht er hättem

grad en Grüene

ad Jagge gjaggt