är wühr gärn

emahl e Läsig

mache

aber är findi

d Lüht nihd

deführ

är wüssti nihd

wär dah chönnti choh

es gebi niämärt

wo dah chönnti choh

diä wo chönntid choh

segid scho lang

uhsgschtorbe

aber är tänki

är mössti gliich

e Läsig mache

und solang läse

und solang ales widerhole

bis ali

wo vorhär dah gsi sind

wider dah währed

warrschinnli mössti mer

d Bible läse und immer nur d Bible

deht findi mer ales was mer bruhchi

e wärdi eim ales erchlährt

mer chöni läse wasmer weli

zum Bihschpihl diä Schtell bim Lukass

wo de Jesuss böhsi Geischter uhstriibt

d Geischter händ irgendwo häre möse fahre

und händ de Jesus pätte dassi tärfed

ine grossi Härde vo Söi inefahre

und de Jesuss hätt dahs ine erlaupt

wobi mer sich cha frähge werum

er hetti si doch vilicht au

diräkt chöne vernichte dänn hezzes nüme ggäh

aber soh sind si usem Besässene uhsgfahre

i diä arme Söi ine und di ganz Härde isch

en Abhang abegrännt und inen Seeh inegrahst

und ali Söi sind vesoffe d Hirte sind

veschrocke wos dahs gseh händ

und händs überahl vezellt und händ de Jesuss

ahtroffe und zu sine Füässe de Gheilte gfunde

Werum
Zum Tühfel
Hätter nid so gläppt
We de Dickens

pliisd
tu miityu
houp
yugess mei neim

iezz reagierez
mitt Beschtürzig
mitt Fassigslosigkeit
und mitt Empörig
uf dahs wosi
hervorgrüeft händ

es segi

we wänn

sich s Gift

überahl hih

wür usbreite

und we wänn au die

wos uhsglährt hebid

mösstid a imm zgrundgah

s Schwirigscht segi

s Vertrouwe z erwärbe

imm vertrouwi niämärt

und är vertrouwi niämärtäm

und är glaubi nihd

dases enn Mänsch gebi

wo würlich amene andere

vertrouwe chöni

ärhaltivillvoire

ärglaubiasih

wenaneheiligi

wenaneschamanin

sisegiales

wasmerchönisih

sisegivolländet

simösinidmeine

simösinaöppismache

simösinühtmemache

eslangi

wassigmachthebi

eslangi

essegisgröhscht

womöglisegi

sgröscht

unzzschönscht

sich vom Unnglück

nid bühge lah

nid kabuttmache lah

we schwähr es au immer isch

we lang es öis abetrückt

wiitermache

dahs segi Läbe

dahs segi sini Definizziohn

nid uhfgäh

nid lugglah

dahs segi öisi Uhfgahb

es segi klahr

es welid ali

nüme läbe

dahs segi

d Erchlährig

es welid ali wägg

iri Uur segi appgloffe

es mösstid sich eigettli

ali Hischtohriker uff de Wält

nurrna mit de Schwiiz befasse

si mösstid doch undersueche

wesi hätt chöne entschtah

was für Bedingige händ möse erfüllt sih

was ales hätt möse zsämechoh

si mösstid doch undersueche

werum si so lang nid underggangenisch

und si mösstid undersueche

wesi wider cha pildet wärde

wännsi iezz undergaht

dahs segi doch s einzig Thema

wo überhaupt chöni interessiere

aber mer schüchi sich vor dene Frahge

si segid es bitzeli z höch

und z grohs und gahr nid ziitgemäss

mer beschäftigi sich liäber

mit allerlei anderem am liäbschte

mit moralische Erwähgige und

mit de Frag wer sich woh und wie

schuldig gmacht hätt

es segi sältsahm

mer mössti Psichiahter sih

um dahs z verschtah

si wüssid au

dahs ales nur glogenisch

nur läri Wohrt

drühmahl nüht

beschtefalls sinz Zaubersprüch

anderscht isches doch

nid z begriife

aber si reschpäcktierid inn

wiler so lüge chönn

wiler sovill wüssi

si glaubid er seg en Häxer

wo soh häxi

dasmers nid chöni bewiise

wo soh häxi

das ali glaubid

es göngi um öppis Humanitährs