es fali imm nühtme ih
zu sihch
aber essegi imm
ja nie vill ihgfale
aberdänn glauber wider
e Schtimm z ghöre
e luuti Schtimm
 wo sägi
schriib
schriib uhf

Umtata hätter gschibe
Umtata
das settmer imm nid duregah lah
das gaht nihd
das isch so zimmli s Schlimmscht
woni die lettschte Jahre gläse hann
und ich ha doch vill Schlimms gläse

wo der Golowiin no
wo der Mani Matter no
wo de Schtirnimaa no
wo de Eichebärger no

wo de Vollmer no
wo de Eich no
wo de Eggimaa no
wo de Nidegger no

wo de Niffeler no
wo de Szehmaa no
wo de Schneiter no
wo de Schtickelbärger no

är hebi sihch

wohl gfühlt deht

si hebid deht echli

enttschpannter gläppt

si segid zwahr

au ali umegrännt

und hebid ali wichtig tah

aber es segi immer gsih

we wänn ali gwüsst hettid

dases Theahter isch

we wänn ali gwüsst hettid

dassi Verlohreni sind

halbi Mänsche

und wämer mittene grett hebi

hebid beidi öppis gschpührt

vo de grundelegende Fähler

we under gfangene Tier

segis gsih und es hebi

niämärt diä Ahsprüch ghah

wo dah erhobe wärdid

es erschiini imm ales dah

echli verruckt und zimmli

unerträhglich wäner vergliichi

er isch plözzli

fuul und fett worde

und hätt fascht immer

nurrna gschlahfe und es

hätt jede chöne mache

waser hätt welle und

niämärt häzz gmärkt

er ghöri gahr nid da häre

er tögi nur soh we wäner

dahäre wühr ghöre i diä

Wält wo totahl künschtlich segi

und chalt und todlangwiilig

es passieri nüht es segid ali

unnahbahr we Tohtti segids

we Tohtti wos aber nid märkid

dassi tohd sind und soh tögid

we wännsi na würdid läbe

und wona Büächär schriibid

frächi uverschammpti ummöglichi

und er segi immer bi alem debi

und gsech ales und er sägi niä öppis

es schträngi inn mängmahl echli ah

si isch niä deht

wosi setti sih

hätter gseit aber

dahs gilt ja für vili

si sind nid deht

wosi settid sih

wohär das chunnt

dahs wetti er wüsse

dahs settid imm

d Anttropolohge säge

weles isch de evoluzzionähr Nuzze

wele Vorteil hätt e Affehorde

wänn immer en Teil devoh

nid deht isch woner setti sih

sisch sicher wägem ärger

es mues immer es gwüsses Nivoh

vo ärger gäh vo ärger

und Truur und Verlasseheizgfühl

s Huus hebi am Ahfang

kei Kanalisazziohn ghah

und vo Ziit zu Ziit hebis

vorem Huus de Teckel

vo de Güllegrueb glupft

und e bruhni Brüe segi usegloffe

dänn hebi mer sofort

de Güllewage möse choh lah

und däh hebi ales wägggsuuget

aber schpähter hebi mer emahl

s Huus at Kanalisazziohn ahgschlosse

das segi e grossi Sach gsih

mer hebi en Grabe grabe und

e Röhre gleitt und ali

segid froh gsih und segid sihch

sehr modärn vohrchoh und

dahs hebi funkzioniärt

und d Güllegrueb segi nüme überloffe

d Güllegrueb hebimer gahr nüme pruhcht

är hetti gärn öppis us derä Grueb

gmacht är hetti si gärn uhsbout

zumene Zimmer zumene Verschteck

aber dahs segi nattürli nid ggange

mer hebi de Teckel zuebetoniert

und diä Grueb nüme pruhcht

ei lähnghisch

hät eini gsunge

mittere Huube ufem Chopf

und Tschellobegleitig

ah ah Belinda

ere zweischtöckige Huube

undeme Schleier

ei längghisch

hättsi namel gsunge

und gliichziitig hättmer

d Nohte gseh öppe zäh

zäh Nohte für eis Wohrt

immer ufe und abe isches ggange

und es hätt schöhn töhnt

e Königihn so hätts öis tunkt

warrschinnli isches d Maria Schtuartt

to earth and heaven will I complain

hättsi gsunge und dänn isch

na en andere choh mitteme grohsse Huet

voller Fädere und hätt langsam und

truurig öppis dezue gseit

watt schäll poor äneass duu

waser mache selli

dahs hätter nid gwüsst

aber d Königihn häzz au nid

so rächt gwüsst und hätt

so häzz öis gschune echli

unnzfride und böhs zrugggäh

mittere schöhne schtarche Schtimm

si hätt nüht welle wüsse vonimm

awej awej häzzi grüeft

und däh mitte Fädere isch wägg

aber wosi widder elei gsih isch

häzzi sofort wider I languish

gsunge grad zähmahl hinderenand

und d Dieneri hebi ire zuegloset

und wider hätt mer d Nohte gseh

für iri Schtimm und fürs Tschello

und mihr händ gschtuhnet

wes us denä Zeiche

so schöni Musick cha gäh

es segi imm gliich

mer chöni sich nid

vohrstelle wie imm

das iez glich segi

är segi soh nid sich sälber

är wetti irgendemahl sihch sälber sih

aber wahs dahs segi dahs wüssi är nihd

vilicht segi mer sihch sälber

wämer ales sägi wasmer tänki

är zum Bihschpihl sägi niä waser tänki

aber di andere sägid ja sicher au nid

wassi tänkid also segmer vilicht sich sälber

ganz sich sälber wämer immer verborge bliibi

immer lühgi und schmeichli und alem zueschtimmi

es gebi öppe hundert Sache
woner nid tärfi säge
niämärtem
de Alte nihd
aber au de Junge nihd

mer wüssed nihd
was de Natuhr ales vorgaht
vilicht isches
de Schwund vode Seegreser
wo ales zum Kippe bringt

gizzächt
en Wähg
ussde globahle
Hungerfale

Isches nid schwirig
Sich dah zrächzfinde

es hebi vill böhsi Lüht ggäh

dohzmal es segi gsih we wänn

nurna Tüüfel würdid umelaufe

jede hebi möse ufpasse daser

nid gfrässe worde segi

es gebi Ziite wosich alldahs

uhsbildi soh we sich au hütt

öppis uhsbildi mer wüssi nid

rächt wases segi es segi nüt

würkkli Böhses aber es chömi

imm doch au bös vohr es segi

uf jede Fall nüt Guets

früener segid näbet dene Tüüfle

au na würkklichi Geischtesgröhsse umegloffe

grosse Tichter unglaublichi Lüht

wo ales durchschaut händ und ales

beschribä abschlüssänd

hütt segi niämärt dah wo dahs was passieri

chönnti beschriibe diä wo öppis beschribid

segid Tuble

är chöni dahs wo diä schrihbid

gar nid läse

es hebid ali dä Ihdruck

är interessiäri sihch zwenig

für dahs aber dahs schtimmi nihd

är interessieri sich überhauppt nihd defür

er welli möglichscht nüht ztue hah demitt