es segi schwirig

öppis z säge

er mösi uhfpasse

waser sägi

er bruchi hühffig

sin ganzze Verschtand

nur zum Uhfpasse

daser nüht blöhds sägi

mer chöni eigettli

fascht gahr nüht me säge

und doch gebis Lüht

diä redid ununterbroche

das segid richtigi Künschtler

es segi ales sehr gschihd gsih

wo gseit worde segi

es segi so gschihd gsih

dasär nüht gwüsst hebi

wonär hetti chöne dezue säge

s einzig wonär gwüsst hebi

segi gsih das ales

wo gseit worde segi

falsch gsih segi

es segi sehr schwirig

s Falsche z bezeichne

und z widerlegge mer chöni dahs

praktisch nihd und wämmers chönnti

so würdis nüht nüzze

es würdid nur ali veruckt

är begrihffi

viles nihd

aber är hebi doch

na gnueg Verschtand

umm soh z tue

we wänners wühr begrihffe

zusim Glück heber dahs

und woner ali diä

fröliche sorglose

Mänsche gseh hätt

wesi Glasse gässe

hännd und Fottene

gmacht dah hätter

wider s Gfühl gha

das all das wönin

immer plagi wonim

sovil Sorge machi

apsoluth unnmögli

isch und apsoluth

unnwarrschinnlich

er hebi di ganzz Nacht

gfägnäschtet näbet ire

si hebi chuhm chöne schlahfe

so hebi är gfägnäschtet

es segi wansinig

wenär fägnäschti

essegi imm

schleyerhaft
wisos immerna
sovill gältt hebi
uff de bank

er glaubi

a nüht

und weli

vo nüht

öppis wüsse

d Weckrunzle hebi Frühauf gheisse

und de Führwehrkommandant Brändli

hätter gseit

und ali händ glachet

und nameh komischi Bihschipihhl hätter pracht

diä Bihschpihli heber aber vergässe

e unngwönnlichi Rueh

hebi sihch i imm uhsbreitet

er hebi dä ehlände Zwärg

böhs ahglueget und gseit

Pass uhf susch gheisch

namel ufd Schnorre

er hätt es wunderbahrs Wohrt prucht

es Wohrt us de Uhrziit

woner vergässe hätt

Weckrunzle

es hättmer gfale

und es hätt mich luschtig tunkt

dasich niä zur Weckrunzle

beschtimmt wordä binn

dä Fäldweibel hettmi sicher gärn

zur Weckrunzle beschtimmt

aber dahs isch zu simm Leidwesä

nid mögli gsih

willija schon idä Fassmannschaft

gsi bin

was inn beträffi

so chöner iezz teschte

we wiht me

vo de Erinnerig chönn läbe

dahs chönimer

tänker

dahs chönimer

sogahr ganz guet

dahs segi ohni wiihteres mögli

bi demm Zauber

wo vo ire uhsgöngi

däh Zauber halti sihch

däh bliibi

wenes goldix Bild 

vilicht segid Männsche we sih

zu Teschtzwäcke dah

aber was für Teschte dah

settid gmacht wärde

segi imm nid klahr

dah chömi imm en Mammutt inn Sinn

i de Dordonnje hebiz en Mammutt gseh

imene Tahl mit villne Funde us de Vohrziit

und berüemte Felsmalereie hebis

au es Freiluftmuseum ghah si hebid

immer öppis ghöre gfürchig schreie

und hebid tänkt es segid Büffel oder

Schtiere aber dänn hebiz en Mammutt gseh

und Chind segid vor ihmm gschtande

und däh Koloss hebi sich beweggt hebi

de Chopf gschüttlet de Rüssel ghobe

und furchbahr trompehtet und diä Chind

segid würkkli verschrocke und zrugggwiche

und si hebid iri Vohrfahre bewunderet

we diä gläbbt hebid we diä überhauppt

hebid chöne überläbe und we iri Nachkomme

hebid chöne überläbe dahs segi es Wunder

d Mänschheit verdanki iri Exischtänz dene

Mammuttjeger und de Mammutt überhauppt

emm Mammuttfleisch und de Mammutthaar

und de Mammuttchnoche und de Mammuttzäh

är tichti nüme vill fascht nüht me

aber dahs segi es guets Zeiche

är segi glücklich es göngi imm guet

är hebis iezz soh schöhn

daser nid rächt wüssi wahs mache

da chönimer nurrna sitze und schtuhne

da chönimer nüht me säge

dah gebis au gahr nüht me zsäge

är hebi en Zueschtand erreicht

wos nüht me zsäge gebi är meini

mängmahl är mössti öppis säge

aber dahs segi nid nötig dahs segi

falsch er chönnti ja na vill säge

aber er gsechi dases nüme nötig segi

was wetti är au na säge

was chönnti mer na säge

si läbid

ganz uverschampt

über iri Ziit use

settig we sih

tärftis eigettli

gahr nid gäh

settig we sih

hebid überhauppt kei

Exischtänzberächtigung

gschpängschtisch segis

we si dänn aber doch läbid

we wänn ales i de Ornig wär

är hätt tänkt

und a siner Tecki gläse

Nüht tänke ischs Schönscht

oder Alles isch lähr

und über settigi Säzz

hätter dänn vill nahtänkt

de Mohntännje

sini Frau hätt

imene andere Turm

gwont zimmli wiit wägg

aber i Sichtwiiti

und d Uhssicht isch

sehr schön gsih

Quid aeternis minorem

Consiliis animum fatigas

dahs hätter a de Tecku gläse

wäner i Gedanke versunke

i sim Turmzimmer hin und här

gloffenisch öber ächt

dahs sälber inegschnizzt hätt

oder öb imm dahs öpper gmacht hätt