si segid zwar
körperlich erscht
mit eim Fuess im Fridhof
geischtig aber voll
voll im Fridhof
hätter grüeft
voll im Fridhof     

siischsotumm
dasi jedesmal veschrecke
wännichsigseh   

du muesches nur wele

häzzi gseit

dänn isches mögli

aber ich wozz ja

hani gseit

und es isch doch nid mögli

ich cha welle

und es passiärt nihd

es passiert nütt

dänn wotsches ebä

nid richtig

häzzi gseit

dänn weissi nihd

weni mues wele

hani gseit

ich binen Idiott

dahs hani doch

scho paarmahl gseit

wär nid richtig wele chan

däh isch en Idiott

was bedühtet dahs

was bedühtez

wänn di Verhaftete

gseit händ

si hebid i irem ganze Läbe

naniäh imene sone suubere Bett gschlahfe

wahs bedühtet dahs

dahs bedühtet

das öpper schpinnt

aber mer nid wüssed wär

bisch am Meendig dah

bisch am Zihschtig dah

bisch am Mittwuch dah

bisch am Dunnschtig dah

bisch am Frihtig dah

bisch am Samschtig dah

bisch am Sunntig dah

bisch dah

bisch am Meendig und am Zischtig dah

bisch am Mendig und am Mittwuch dah

bisch am Zihschtig und am Dunnschtig dah

bisch morn dah

bisch hütt dah

bisch dah

bisch immer dah  

är hebi en Seich zämetichtet

en ferttige Seich

är tichti immer nuren Seich zäme

enn Bächer schicki

enn Bächer chunnt

enn Zorrnesbächer

und ali Völlker

selid trinke druhs

trinke sölizi

vomm Zorrnwiih

und umetorkle

de Veschtand verlühre

untt Völker trinked

Jerusalehm trinkt

und ali Schtett

Könige und Führschte

inen Trümmerhuufe

wirz verwandlet

es graut eim devohr

zum Hohn wirz zum Fluech

und de Faraoh trinkt

de König vo Egippte

mit sine Chnächte

und sine Fürschte

und simm ganze Volk

s ganzze Gmisch trinkt

s Mischmasch vo Uhz

Askalohn und Gahsa

diä Reschte vo Assdod

und d Ammonnitter

d Könige vo Tiruss

und d Könige vo Sidon

und ali Völker überem Meer

diä mit de gschtutzte Haar

und ali Könige imm Norde

diä wo wiit ewägg sind

und diä wo nähcher sind

si ali trinked

eine nachem andere

ali Könige wos gitt

ali Völker trinked

au wär nid will trinkt

nämed de Bächer

trinked tönd trinke

biser ummgheied

und chozzed und

nid wider uffschtönd

niämärt wirt uffschtah

ali wärded ligge

s gitt käne wo nid trinkt

vomm Zorrnnwii

woni bringe

und ali wirz ummlegge

und ali wärded fale

und wärded tohd sih

und nüme läbe

är wetti

wischens ohf Tschoänäh

übersezzä dahs segi

er chömi immerwider ufs Glihche zrugg

er hebi e Paradihsesvohrschtelig entwicklet

und schtudiäri iezz immer dranume

ohni zumene Schluss zchoh

ärischsotumm
dasi jedesmal veschrecke
wännichengseh

faschtaliveschreckidinn
nurrdi schönäfraue
veschreckidinn nihd

wägg

hätter grüeft

wägg

und isch mis Wohrt

nid wenes Füür

wenen Hammer

wo Felse veschlaht

diä Augä

lüchtid

über imm

wiänä Sunä

er bruchi

käs anders

Liächt me

er chönnti

im tüüfschte

Tunkel läbä

er hetti

hell gnueg

diä Augä

lüchtid

so fescht

so schtark

diä Augä

segid soh klahr

dasär immer i di

gröhschte Schwirigkeite chömi

wänns uf inn

grichtet segid

es segi imm

we wänn vorimm

e Göttin währ

mer chöni

dahs vo gschibe wärdi

guet vergliiche

mitt demm wo anderi

sogenannti Kunschtschaffendi produzierid

es segid willkührlichi Ahordnige

vo irgendwelche Sache

Kabel oder Escht oder Iseteili

wo niämärt verstöchi

meischtens öppis kabuzz

kabutti Möhbel kabuzz Gschier

diräckt am Bode veströit

soh liht au i de Litteratuhr

ales am Bode

mer chunnt sihch blöhd vohr

wämer sich demit befasst

aber ebä grad dahs

segi warrschinnli beabsichtiget

sicher nihd vo de

sogenannte Kunschtschaffende

diä märkid nid umwases gaht

diä meinid si machid Kunscht

sondern diä obedrah diä Komissiohne

und Kultuhrbeamtte und Kultuhrbeuhfträitte

welid dassich ali blöhd vorchömid

oder warrschinnli märkid au diä nihd

umwases göngi niämärt märkz

nur irgendwoh imene Syschtehm

häzz irgendwelchi Forrmle

und Parahmetter wo würkid

en gheime Algorittmuss

früener
hebis kei mänsche gäh
wo gseit hebid
si segid nidbinähr 

gottlob

hätter grüeft

gottlob

isch däh

mitt simm blöde Rucksack
wiitergloffe

es segi we wännsi würdid fahre

aber nid frey sondern ihpundä

i grossi Forrmä es segi wewännsi

würdid unnghüri Orrnamänt findä

Himelsorrnamänt und wewännsi

sälber zu somänä Orrnamänt würdid

und sich idemm und mittdemm bewegä

wewännsisihch würdid entwicklä

und nöii Forrme bilde langsamm

und doch schnäll dräje tönz essihch

und singe tönz dezue öppis Alz

inere altte Sprahch wo niämärtme

verschtaht töhnez schwäbez singez

wärdez verbunde wärdez begleitet

chömez zäme mitte Himelsmusicker

wärdez Himelsmusicker

es segi we wännsi würdid fahre

und imm fahre anderi zum fahre bringe

immer meh chömid dezue immer nöji

bis di ganzi Wält mittfahrt bis sich

ales dräit de Himel und de Mond

und ali Schtärne und ales uf de ärde

fahrt und dräit sich und tanzzt

und d Hüüser tanzed und d Schtrahsse

unz Bundeshuus tanzet und ali drinine

und ali drumume ali Drohgesüchtige

und ali Drohgehälffer und ali Polizischte

iezz chömer

iezz chömmsi

iezz chömizzi

es ischem choh

es ischere choh

es ischene choh

jahschtalinismus

jahschtalinismus

jahwahssuscht

shätt känn Sinn gha

sich so schön aazlegge

swär nid nötig gsih

chomm

chomm nuhr

chomm doch

chomm iezz

chomm namahl

chomm nur namahl

chomm doch namahl

chomm iezz namahl

chomm nuhr

chomm gschwind

chomm iezz doch

chomm iezz doch namahl

chunsch iezz

chunsch namahl

oder chunsch iezz nihd

chunsch niämeh

chomm doch gliich namahl

mer weiss ja niä

wännt Wält undergaht

mer mösi d Schwiiz uhflöse

d Schwiiz schtöhri

ales Schwiizerische schtöhri

chöni nüme pruhcht wärde

i derä nöie Wält wo chömi

wo ales vernezzt segi

ales globahl ales nurrna ei Wält

mitt einere Zäntrahle und

einere Regiärig dah passi

d Schwiiz nid drih dah segi

d Schwiiz en Anachronismuss

en für di wihtere Entwicklig

gfährliche Anachronismus

wo mösi verschwinde am beschte

segis wämer sälber acktihf dezue

biiträhgi und nid wahrti

mer wärdi dahs nid beröie

es chöni ja würkli nurrna besser choh

wämer eifach läbi

und sihch nid belaschti

mitte Ahsichte vo andere

und wämer au sälber nid vill tänki

dänn segis Läbe durchuhs erträglich

aut Ehe erschihni eim dänn

als öppis ganz normahls

was sägezi

was machezi

was chömezi

was bringezi

was läsezi

was tänkezi

was meinezi

was schwäzzezi

was suechezi

was tönzi wider tumm

gönnzi

gönnzi nur

gönnzi

vilichtömmir
vilichtsettedmir
vilichtwämmir
vilichtsettedmir
was was

es gsechi nid so uhs

we wännsi mitt dere

opposiziohn färtig würdid

si segid nur wenig

und segid für diä Uhfgahb

schlächt uhsgrüschtet

si hebid ja nur kohmischi

langi Sähbel diä gahr nid

guet geignet segid fürd

Bekämpfig vo demm Ungezifer

viles liht zwahr scho am Bode

halbe tohd aber vieles fangi

sich au wider uhf und wärdi

wider sehr acktihf und drücki

und flühgi und zwängi und drängi

und schtohssi und stächi

är glaubi nihd dases guet uhsgöng

diä Insäckte gsechid villz

böhsahrtig uhs villz gführchig

es hebi es unheimmlichs Läbe i ine

währettemm es obe ebä grad

a Läbe fähli diä ängel hebid

kei Chrafft und segid uhsgmärglet

und unnerfahre und gschtabig

währettemm une ales vollgfrässe-n-isch

und sich pahrt und vemehrt

und guet organisiert isch

d ängel mönd uhfpasse dassi nid

abezoge wärded und sich i demm

Züüg verfanged und verwickled

wänns wenigschtens e Rüschtig ahettid

si händ ja nur ängelsmänteli ah

diä villz lang sind und we veruckt

fladdered fascht we di vilä Unntier

öpps nid doch gfährli seg

gfährlicher als mer tänki

es segi vilicht ales nid so schtabihl

mer hebi es veruckz Glück ghah

dasmers iezz so liächt hebi

dasmer wäret villne Jahrhunnderte

doch immer wider Forttschritte

gmacht hebi und vili Irrtümer

und en schauderhafte Aberglaube

appgleit hebi es segi doch hütt

en Zueschtand erreicht wo relatihv

forttgschritte-n-isch öbmer dahs

chöni bewahre segi völlig offe

es segid unnghühri Bildigsahschträngige

nöhtig gsih und hütt segmer doch müed

hütt chönimer dahs ales gahr nüme

bewahre hütt göng doch sovieles

zumm Tüüfel öbmer iezz nid wider

ändgültig ufem Wähg zrugg segi

diä Frahg mösstidmer öis schtelle

vilicht glinggtöis
vilicht chömmir infiltriäre

si brüeled

si brüelet

si brüelid

werumm brüelezi

werumm brüeleter

ali brüeled

brüelezi will öpper gschtorbe-n-isch

oder brüelezi über sihch

hänzi Heiweh

wettezi nöimet anderscht sih

si brüeled i de Chile

und si brüeled

wänns us de Chile usechömed

und wänn de Presidännt rett

si welid dasd Schwiiz verschwindi

es schtöhri si dasesd Schwiiz gebi

was wänzzi ächt was wettezzi

dahs wührähr gährn wüsse sicher

wettez öppis wo ine besser gfallt

wo soh isch we sih echli schmuddelig

echli verloge und unnohrdettli

si wetted öppis wo nid funkzioniärt

es schtöhrzi ales wo funkzioniärt

si händ liäbär öppis wo kabutt isch

dahs gfalltene a demm hänzi Fröid

gib Chrafft
o gibt Chrafft
gib Hoffnig
gib Liecht
gib Läbe
gib Vernumpft
gib Sinn

immer veschrocke
immer denäbet
immer niämert
unttänn dochwidder debih

unttänn dochwidder ihpildet
unttänn dochwidder magischtrahl
unttänn dochwidder bewunnderet
immer en chliine Blöffer
immer tueter wewäner
weissgottwas wär
immer tueter wewänales
iderornig wär

ssädü
gamposanto
hebi d Herzogin grüeft

es segi
iezz ales
nurrna
gamposanto

ähr segi de ehrscht

und de letscht

und ähr währdi öis

Sache säge wo mihr

kei Ahnig hebid devoh

diä Frahg vom Paradiehs

beschäftigi inn hüüfig

wiä chönntis im Paradiehs

uhsgseh isches ganz anderscht

als dah oder isches fascht

we dah und nurr es bizzeli

anderscht nur liächt verschobe

är wetti nid es Paradiehs

wo ganz anderscht währ

es wär für inn käs Paradiehs

wänn gwüssi Sache würdid fähle

es gebi doch dah unnghüüri Wunder

wo imm Paradiehs nid chönntid

schönner sih Musikk zum Bihschpihl

oder anderi Sache wo soh schöhn segid

dasmers gahrnid uhsschpräche chöni

Gnahde

Errbahrme

wiä isches mögli

dasmer

dases

dasduh

dassich

dassi

dasihch

dasähr

worinn beschtaht en Liäbässiig

en Liäbässiig beschtaht darin

dasmer öpper dezue bringt

nurrna a eim zdänke

und a niämärt anderscht me

en Liäbässiig beschtaht darin

dasmer öpper dezue bringt

daser eim i alem folget

dasmer öpper zu simm Sklahf macht

und er glücklich isch

daser Sklahf tärf sih

und er debih meint

er segi imm Paradiehs

wohih

wohih

ach

wohih

dahih

dahih

dah

ali schöne Eigeschaffte

segid bi ire

uff die wunnderbarschte Art

uhsgeprägt

er chöni siich nid vorschtellä

das öppis usserhalb vode Schwiiz

chöni funktioniere

sini pischamahosä

hebid en offne hoseschlitz

si hebid eifachnurr enn schpalt

essegi ebä es jappanisches pischama

tjapahner

hebidali settig pischama

tjappahner

segid ali chranck

er hätt gmeint

er chöni öis demitt

be-ihdrucke

woner sich für dnacht ummzoge hätt

bisch das duh gsih

jah

das bin ich gsih

häsch gmeint

es segi öpperander gsih

bidir

ischimmerales

wunnderbaar

auswätter

immerauswätter

deht ischiezz
e Schwarzi gschtande
imene lange farbige Chleid
e schmaali chliini Gschtalt
wenä Süülä
oni Bewegig
naganzjung
und nachärä Halbschtund
wonerwidder
verbihgloffenisch

Undenalti Dahme

hebis ghah

enuralti Dahme

sicher scho nünzgi

segisi gsih

diä hebi au tanzzt

das heisst si segi

nurrna dahgschtande

und hebi t Ärm bewegt

sehr fihn

sehr schön

ganz langsam

hebisi t Ärm beweggt

nurrna t Ärm

Währdujuhkeimfromm

heber grüeft

mittsiner gwaltige Schtimm

woner e paahr Lüht gseh heb

wo tanzet hebid wiä vo Tüfel bsässe

zmizzt isimm Song ine heberdahs grüeft

frommosteilia

hebiz zrugg grüeft

frommosteilia

hebi de Sänger gschtuhnet

we wänndahs naniä vorchowähr

das Lüht us Auschtralieh

a eim vosine Konzzärt tanzet hebid

wattmjusic dojuhliketohiär

heber grüeft

eisidisi

hebioz grüeft

watt, hebi de Sänger göisset, watt

eisidisi

es hebi imm fascht öppis gäh

dä ticke schwarze Mah

segi fascht hinenuse gheit

eisiihhdiihhsiiihh

dojuh riäli wannttohiär eisidisi

jeah hebiz grüeft allimittenand jeah

soh hebi de schwarz Mah grüeft

juschällhäv eisidisiih

und er hebi eifach appgwunke

und hebi de Musikker Ahwisige gäh

d Bänd hebi ihres Schtuck underbroche

si hebid d Gitare gwächslet

und d Bläser hebid e Pause gmacht

und dänn segis lohsgange

dänn hebid diädoch tatsächli eisidisi gschpillt

eisidisi

es hebi allne d Haar hinderegschtrählet

au är segi fascht ummgheit

er hebi naniä sone Wansinnsmusik ghört

eisidisi

das segi öppis Unnerhöhrz

und de schwarze Sänger hebi eisidisi gsunge

hebi aber nid alli Worrt gwüsst

sori heber gseit sori

aber das segi überhauppt käs Problehm gsih

eine vo de Auschtrahlier

segi eifach uffs Podium gschprunge

und hebis Mikrofohn gnoh

und hebi sälber gsunge

mittere Stimm

wenernid glauppt hebi

dases e Schtimm chöni gäh

enere höche Stimm

und hebi ali Worrt gwüsst

es hebi ales tobet

au di eltischte Jahrgäng hebid tobet

er sälber hebi richtig Problehm überchoh

er sälber hebi tänkt

daser naniä so öppis Wilz und Härtz

ghört hebi

es segi s Wildischte

unz Härtischt gsih

woner jeh erläppt hebi

s Verrücktischt

s Gröhschti 

Es hebi nanie Geischt gäh

uf dere Ärde

t Mänsche tühschid sich

wännsi glaubid

dahs wassi hebid

segi Geischt

si wärid woll am wöhlschte

in Schanghei wännsi chönntid

mit sächzä Milliohne Lüht

i einere Schtatt wone

dänn wärs ine wohl

inere Gloubahl Sitti

ahgschlosse amm Dahte Haiwej

läbe inere Schtatt wo ali schpined

dahs wettiz deht würdiz nid uhffalle

dah ide Schwiiz fallizi nattürli na uhf

und erschtna zimmli unnahgnehm

zweituusig Hochhühser gebis in Schanghei

und si segid bis zu drejhundertt Mehter höch

und mer riissi ales app ali allte Schtrukktuhre

ales verschwinntt di allte zweistöckige

zämeboute Hüüser di hischtohrische Longtang

mösid wägg und en unngghühre Heitechpahrck

setti entschtah de gröhscht vo de Wällt

mitt Heitechmännsche wosich nurrna

mitt Finanzfrahge befassid i Finanztürmm ine

Pudong heisst dahs wo entschtaht und isch

gröhsser als Parihs so wemer z Schanghei

ales abrihsst so settimer au i de Schwiiz

ales abrihsse di ganzz Schwiiz und vilicht

auna Pahris dezue und ganzz Frankriich

er hebi uss de Bible

ali Schtellle usegsuecht

wos Wohrt lucem oder lux

vohrchömi

und wändi iezz diä Schtelle ah

uff sini Situazziohn

är hebi au es sones Liächt

es göttlichs Liächt

wonimm lühchti

jedä Tahg

und jedi Schtund