är

wär

gschider

nid

ggange

är hebi iezz nur

en schlächte Ihdruck überchoh

är hebi zwar scho vorhär ales gwüsst

und scho vorhär en schlächte Ihdruck ghah

aber iezz segi dä Ihdruck

na schlächter worde

iezz chöner eigettli

gar nüme schlächter wärde

är

wär

vilicht

gschihder

garnid uf d Wält choh

er häzz eifach

jah

er häzz vill eifacher

jah

er häzz am eifachschte

jah

er mues eigettli

fascht nüht me mache

er luegt eifach nuna zue

oder luegt nidemahl me zue

sondern gaht go Museeä ahluege

und verzellt vo flähmischer Malerei

verzellt vom Bröichel und vom Rubens

enandere hebi immer

i däh chlih Block gschribe

wosi überchoh hebid

inen elegantte Block

wo für normahli Notizze

gar nid so geignet gsi segi

ehner für Gedicht aber

er glaubi nihd dass däh

Gedicht gschribe hebi

er hebi vill z dumm uhsgseh

vilicht tömmihr

vilicht gömmihr

vilicht simmihr

vilicht wämmihr

vilicht hämmihr

vilicht mömmihr

vilicht chömmihr

vilicht wettedmir

vilicht söttedmihr

vilicht wüssedmihr

vilicht tänkedmihr

mer töndnihd

mer göndnihd

mer sindnihd

mer wändnihd

mer händnihd

mer möndnihd

mer chöndnihd

mer wettednihd

mer söttednihd

mer tänkednihd

mer wüssednihd

vilicht tömmernihd

vilicht gömmernihd

vilicht simmernihd

vilicht wämmernihd

vilicht hämmernihd

vilicht mömmernihd

vilicht chömmernihd

vilicht wettedmernihd

vilicht söttedmernihd

vilicht tänkedmernihd

vilicht wüssedmernihd

es hebi eine ggäh

däh hebi di ganz Ziit

imene Buech gläse

en Mexikahner segis gsih

emahl hätter s Buech

wäggleit und echli gschlahfe

unddam zweite Tahg

ischer gahr nüme choh

s Buech dahs heber gseh

segi es seer es

wüsseschafttlichs Buech gsi

PSICOANALISA heber gseh

segi imm Tittel vorchoh

füren Polittiker

segi doch all dahs

vo gringem Inträsse

was hebi dahs dänn

fürinn scho füre Bedühtig

är glaubi

dassidah

intellektuell

de andere Schwiizer

underläge segid

aber da tüscher sich vilicht

vilicht segi ganz allgemein

s Niwo gsunke

es segid ali am verblöde

dassegi sunneklar

öppsächt mittem Fihnschtaub zämehangi

er hebi gläse dass de Fihnschtaub

di geischtige Leischtige reduziäri

einä

hebi uhsgseh

we dä Ärnscht Jünger

dahs hebin

bis zumene gwüsse Grahd

tröschtet

undinn widder uhfgrichtet

aber bitte

was welimer dänn

es segi ales guet

soh wessegi

mer selis sohlah

wessegi mer bruchi

doch kei Kunscht meh

grossi Kunscht hebi

immer öppis Gfährlichs

grossi Kunscht hebi

öppis Zerschtöhrerisches

mer bruchid hütt gwüss

kei Katthedrahle me

und kei Schtahtue vom

Erzängel Michael und

kei Glasfeischter mit

Schtifterfiguhre und

Ohpere und Ornamänt

und Guttsche und Altähr

und kei Schlösser

und ticki Romähn

dah mösi mer sich nid wundere

wänns Bombardemänt gebi

und periohdisch ales

zsämetätscht wärdi

es hebi i all demm

zvill Sinn gha zvill

Energih zvill Religiohn

zvill ärnscht und Iifer

und immer a alem Bluet

und soh segi är froh

wänn hütt wänn öppis pout wärdi

en Blöhdsinn pout wärdi

wänn hütt ales lähr segi

und für ali wos gsechid

enttüschend und entchräftend

wämer weli wüsse

was i denä Geböide lohs isch

so mösimer nuremahl

diä Sache ahluege

wo i denä Geböid

als Kunscht uhfgschtellt sind

soh we dahs

wo uhfgschtellt isch

nid Kunscht isch

soh isch dahs

wo gmacht wirt

nüht rächz

wisoh chunnt dahs

das ali immer glaubed

är segi än Idiott

es segi dahs nämmli

es allgemeins Fänomehn

är schtelli dahs

immer wider fescht

es gebi immer meh Mänsche

wo glaubid di andere

segid Idiotte är sälber

glaubi dahs ja au

är glaubi das

ali Idiotte segid

und är findi sich so

au demitt app

das ali glaubid

är segi en Idiott

aber wiso das chömi

frägi är sich

und öb dahs nöi seg

oder öb dahs scho immer

soh gsi seg

wänns nöi wär

dänn wärs ja

geradezue beunruhigend

aber es isch warrschinnli

nid nöi sondern uralt