Empfang doch

wänn mis Läbe verbih isch

mini verzeerendi Liäbi

usem Rauch

wo vomimm brännende Liib uhfschtigt

es gebi

zwüschet de Mänsche

mängmahl ganz

unheimlichi und

fanttastischi Beziehige

diä Beziehige gsechimer

normahlerwihs nihd

d Mänsche märkiz nihd

dassi verbunde sind

uf Läbe und Tohd

und bis in Wansinn

dahs chömi us de Vohrgschicht

deht segis na vill meh

um Läbe oder Tohd ggange

und wänn zwei zsämechoh segid

segis psunders gfürchig gsih

und unnheimlich wichtig

dahs segid grossi Momännt gsih

dah segi plahnet worde und uhsgheckt

dah hebi mer de Ummschturz vohrbereitet

und Tröi proche und anderi verrahte

zitteret hebi mer und Angscht hebi mer ghah

und all dahs läbi hüt na nah

är schpühri dahs na ganz genau

är märki das ales verschwinde chönnti

und undergah es segi veruckt

är hebi gseit

es segi beihdruckend

es segi aber nattürli

überhauppt nid beihdruckend

es segi en zimmliche Blöhdsinn

allerdings en unproblemahtische

är weli nüht degäge säge

mer tärfti nüht degäge säge dänn

diä Ahrt vo Blödsinn segi unschädlich

und me mösi ales wo unschädlich segi

begrüesse und sogahr fördere

das schtabilisieri

är förderi ja dä Blöhdsinn

är nemi teil und machi mit und hälfi

und sägi

es segi

beihdruckend

und sinzzi iez gheilt

nei ich bi nid gheilt

ischinechaltt

jahseerchaltt

früener

heber seer sälte

vo ire tröimt

aber wäner

tröimt hebi

so segiz

üsserscht iidrücklichi

Tröim gsih

Tröim wonär

nid vergässe hebi

und nieh vergässe wärdi

Woner hütt

am Ändi vo de Schtrass

adem schöne alte Huus

vorbih cho segi,

woner immer verbih chömi

sitt zwänzg Jahr

und naniä jemahls öpper gseh hebi

und sich immer gwunderet hebi

wär ächt dadrin woni

Heber hütt ghört

weneinä grüeft hebi

Himelhärrgottschtärne nanemal

komisch segis

dasär i de letschte Ziit

fascht jedi Nacht vo ire tröimt hebi

und zwar immer schöhni sanfti schtilli Tröim

grad i de letschte Nacht

hebi är guetmüetig wenär segi

a irgendere Therapiih oder

a irgendeme schreckliche Seminahr teilgnoh

wo vo alem Ahfang ah feschtgschtande isch

dases völlig sinnlohs isch nur Ziitverschwändig

nüht anders und är hebi sich gwunderet

dass au sih teilgnoh hebi freiwilig

für sih wärs nid obligattohrisch gsih

aber soh segi si bi alem debih gsih

und hebi ales mittgmacht s Tümmscht

und s Langwiiligscht und de gröhscht Blöhdsinn

undär hebi bi all demm de Ihdruck gha

dass si wägenim dah isch und nurr wägenimm

dahs ales mittmacht nuruminn z gseh

und nurummittimm im gliiche Kreis z sitze

und dahs segi sones wunderbahrs Gfühl gsih

dases imm gliich gsih wär

wänn das Seminahr ewig duuret hetti  

komisch segis

das mir

Vohrstelige entwickled

vo höchere Wesä

und komisch segis

das mir au

Mänsche verehred

als höcheri Wesä

als ängel

was bedühtet dahs

was heisst dahs

was hätt dahs für en

evoluzzionäre Sinn

es dient sicher

de Forttpflanzig

und em sozziahle Zämehaltt

susch gähptis dahs nihd

aber werum

sind diä Gfühl

bi de eintte so schtarch

und bi andere so schwach

weles isch d Verteiligskurve

und werum gitts diä Kurve

mer mösi misstrouisch sih
immer und überall

öbsi ächt
nipfascht
echli es problehm gsih segi
diä Beziäjig

Überziit

sisch ales
Überziit 

shett chöne schnäller gah

wämmer hetti wele

wämmer echli uhfmärksammer gsih wär

aber mer hätten ja scho lang uhfgäh

mer hetti chöne

vor öppe achttuhsig Jahr uhfhöre

wo si mitte Keilschrift cho sind

und mitte Hiärogliife

deht häzz doch allne appglöscht

mer hätt plözzli ghört

wesim Himel grett händ

i hundert Jahr isches fertig

i hundert Jahr ischer wägg

i hundert Jahr simmeren los

ufeme Bänkli segi eini gsässe

und segi ganz wüetig gsi

hau ab
häzzi zumene Tunkelhütige gseit

wo näbetire ghocket isch

ganz verdatteret

hau ab
du chunsch sowiso wider is Gfängnis
aber ich

ich bruuche Sex

verschtahsch 

är segi au

en Idiott

wilär dichti

obwohl är wüssi

dasmer a siini

Gheimnis nid

mit Worte anechunnt

au mittem schönschte

Gedicht chönimer

nur beschtefalls

en Hiiwiis gäh

und zwar meischtens

en unngnaue und

irrefüerende

sini Gedicht füerid

ali uf Abwäge

sini Gedicht chömid

imm nach e paar Tahg

tumm vor tumm

und ganz fahd

är segi en Idiott

aber eine wo sich

mös verschtellä

und soh tue

we wänär normahl wäri

dahs machi imm Müeh

dahs tögi imm weh

dahs segi

e veruckti Kwahl

är wär gärn

en normahle

guete schöne Idiott