erquicket mich

mit Blumen

so hebis einä übersezzt

im Barockziitalter

sit är diä Ziile gläse hebi

interessieri är sich

sehr fürs Barockziitalter

mer hebis glaubi är

zimmli underschezzt

diä hebid ganz verdammt

chöne tichte

mer sel doch nur lose

erquicket mich

mit Blumen

umbstecket mich

mit äpfeln

dahs segi doch

wenen Rockendroll

mer mösi sich dahs

vorschtelle we dahs

grüeft wärdi gschriiä

vo einere wo ufeme Bett liht

oder umsinkt eifach uf de Bode

mer wüssi im übrige

gar nihd wär dahs rüefi

mer wüssi dahs niä

mer nemmi sicher

zerscht emal ah

dases e Frau segi

wäge de Blueme und de öpfel

aber werum mösis e Frau sih

es chönnti au en Mah sih

gradsoguet chönntis en Mah sih

uf jedäfall isches öpper

wo fascht wansinig isch

oder gseht daser wansinig wird

denn ich werde

krank vor Lieb

rüefter

flüschtereter

chrank seiter seger

chrank wärder

mer chönis

uf di verschidenschte Arte

übersezze

und jedesmahl

segis wunderbahr

am schönschte segis

wänns unverschtändlich segi

wänn en grosse Durenand härrschi

vo Jubelrüef und Beschwörige

vo Lobpriisige und ängscht

vo de verschidenschte ängscht

Todesängscht

und au Riiseängscht

dass mer zum Ziil chunnt

d Erfüllig segi i villne Fäll wenän Tohd

e grossi Liäbi

zeigi ja immer

we unverschtändlich

s Läbe segi

we unnbegrihflich

wenän gfürchige Traum

womer niä wüssi

wes üsechömm

di ganzi Wält

vom Afang ah bis hütt

cha de Tahg nid ufwiege

a demm Israehl

s Lied vo de Lieder

überchoh hätt

dänn ali Schriffte

sind heilig

s Lied vo de Lieder aber

isch s heiligscht

i de Bible

hebis viles

wo sich uf sih beziehi

wänns heissi

capillis tuis sicut grex caprarum

quae ascenderunt de Monte Galaad

dänn segid iri Haar gmeint

iri Haar tanzid und gummpid

ja immer so vor imm

es segi immer we wänn

e grossi Härde jungi Schahf

en Bärg derapp chiem

Liäbi segi

we ali mänschliche Empfindige

erklährbahr fascht wenen füsikalische Prozäss

so öppe wett Bildig vo Krischalle

öb ächt

diä Revoluzziohn nur vo imm abhangi

oder öb ächt na anderi mösid mitthälffe

und ihverschtande sih

dahs hebersi gfrähget

d Revoluzziohn hangi nur vo imm app hebsi gseit

und glächlet uf iri gwönndlichi göttlichi Ahrt

es hangi nur vo imm app nid na vo andere

di andere würdid imm folge und mache waser weli

i wahs ächt diä Revoluzziohn bestöchi hebersi gfrähget

öbsi nur vilicht nur us Wohrt bestöchi oder au i Wärke

vilicht bestöchi si nur us Wohrt wo uhsgschproche wärdid

vilicht langi dahs aber vilicht segi au dahs nid nöhtig

es segi doch scho ales klahr sittlangem klahr

d Revoluzziohn segi doch scho sitt zäh Jahr imm Gang

und segi vilicht sogahr scho färtig

jah vilicht segi ales scho färtig

und är segi ganz denäbet

wäner sihch iezz settigi Frahge schteli

ähr begrihffi vilicht nihd umwases ggange segi

ähr hebi dahs niä begriffe

si hebi nüht gseit aber iri Auge hebid

glühchtet i irer gwönndliche göttliche Ahrt

öbsi ächt

scho tänkkt hebi

er segi feig

oder öbsi dahs

naniä tänkt hebi

si hetti doch

vilicht Gründ

dahs z tänke

öbsi anderi Sache

tänkt hebi

er wetti wüsse

wassi tänkt hebi

ales

wosi tänkt hebi

wetter wüsse

wonerdahs

gseithebi

hebisi

faschtesjarlang

nütme

welämittimm

ztuehah

und widder hätter

e Schöhnheitt gseh

en Huufe Bletter

häzzi vorsich ghah

und ufem Bildschirm

Tabälle und Diagramme

tottahl unzuegänglich

ischsi dahgsässe

was wirt uss dihr

hätter tänkt

we immer

sone Frahg

zschtellä

hätt d Schprächeri geseit

findisi

ehrlich gseit

fascht uverschämmt

das segi ja scho lang

sini Theorih gsih

es mösi i öisere Gsellschaft

immer Inschtanze ha

wo belehre und belehrend

uf allne umehacked

mer mösi ufpasse

suscht haui eim eine

oder au eini eis uf de Teckel

es segi soh we wänn immer

eine oder eini mittere Kühle

wür dah schtah und jedem

eis tätsche wo verbihgaht

är passi uhf imm passieris nihd

aber allne andere passieris

und alli andere fanged sich a tucke

und chönd schliessli

gahr nüme ufrächt gah

är göngi na ufrächt

aber de Priis wonär zali

segi höch är mösi sich

echli zvill ärgere

är nüzzi sich ab

är chömi zu nüht

und dahs segis Ziihl

vo all dene Ahschträngige

dahs segis Ziihl

Lüht wo zu nüht me chömid

voralem nid zum Tänke

wiä chömmir mache

das öppis passiert

was mösstich säge

ich chönntja viles säge

ich tänke ja de ganzz Tahg

immernur Sache woni nid säge

ich säge so vill nihd

dases falsches Bild entschaht

und dänn immer

öppis ganz anders passiert

als passiere chönnti

sägi also nids Richtige

oder sägi ebä grad s Richtige

mues ales soh sih wes isch

mömmir öis demit abfinde

oder chömmir öppis verändere

würdid mir öppis verändere

wämmir öppis anders säge würdid

oder chähmtis dänn nur

zunere chliine Verschiebig

zunere churzfrischtige Uhfregig

zunere Energihverschwändig

und würi dänn s Pändel

wider zruggpändle

und wär dänn ales

wider soh we vorhär

und hinderet öis drumm

e gschiidi Natuhr

das ales zsäge

womer wetti säge

und bruhcht d Natur

settigi Exemplar

wo immer de Chopf

voll schöhne Sache händ

oder wo glaubid

immer de Chopf

voll schöhne Sache zhah

bruhchtsi dahs

für iri Zwäcke

es liessti sich

durchuhs e Evoluzziohn dänke

bi dere bi de sogenannt höchere Tier

ales ganz anderscht verlaufe wühr

es wäri dänkbahr

dasd Evoluzziohn sich d Ameise

oder d Piänä oder suscht es Insäkkt

zum Muschter nähmti und mir

so keis Bewusstsih hettid

es würd aber ales gliich funckzioniärä

genau gliich oder na besser

mer wäred eifach dur Grüch gschtühret

dur Tämpperattuhre und chemischi Prozäss

aber was reded mir dah

villicht ischesja grad eso

und mir märkez nur nihd

mir märkez nihd

sini Gedicht und au ales andere

das tuusigdrühundertsiitige

ut videlicet

segid für Mänscheforscher bestimmt

si mögid drus entnäh

wahs ales möglich segi